Testigo sa Pique kidnap-slay mitumbok sa Briton

CEBU, Philippines - Gipadayon kagahapon ang cross examination sa ikawalong testigo nga si Ligaya Escultos bahin sa kasong pagdagit ug pagpatay sa 6-anyos nga si Ellah Joy Pique diin ang akusado mao ang manag-uyab nga sila si Bella Ruby Santos ug Briton nga Ian Charles Griffiths.

Orihinal untang sa niadto pang Septiyembre 3, 2012 kini gipresentar apan tungod sa kakulian sa panglawas ni Escultos nasibog kini kagahapon.

Si Escultos ang ikawalo nga prosecution witness batok nila ni Griffiths ug Santos kinsa gipasanginlan nga maoy mi-kidnap ug mipatay kang Pique.

Base sa testimonya ni Escultos, 34, taga Minulos, Barili niadtong Pebrero 8, 2011 nakit-an niya ang usa ka langyaw nga lalaki nga nagbarog likod sa usa ka Pajero nga dunay gialsa nga sako.

Matud niya nga ang sako gibutang sa dike ug gihagbong sa pangpang. Matud niya wala siya kakita sa pag-abli sa sakyanan diin gikuha ang sako. Diha sa ubos sa maong pangpang nakit-an ang patay’ng lawas ni Pique pagkasunod adlaw.

Si Escultos positibong mitumbok ni Griffiths nga gipakita sa defense counsel nga si Julius Caesar Entise.

Matud ni Escultos niadtong higayuna mihunong sila sa Sayaw beach sa Barili kauban si Richard Ian Bruce Bansuan tungod sa nakita nilang Pajero nga mi-parking daplin sa dalan.

Si Escultos miangkon usab nga milagda siya sa usa ka affidavit human nabasura ang kaso batok sa unang manag-uyab nga gisuspetsahan nga sila si Sven Erik Berger ug Karen Esdrelon.

Apan si Entise miingon nga nag-usabusab ang testimonya ni Escultos ug dako ang iyang pagdudang tumotumo lang kini.

Ang abogado sa depensa nga si Rameses Victorious Villagonzalo miingon base sa testimonya ni Escultos wala kini sa dapit diin gilabay si Pique.

Apan gipakagamay lang kini ni Atty. Hazan Bargamento sa prosekusyon ug miingon nga komento ra kini sa depensa ug wala kini makaguba sa ilang kaso.

Kahinumdoman nga sa unang pagpresentar kang Escultos nakuyapan kini tungod kay misaka ang blood pressure niini tungod sa stress. Gitakda ang sunod nga husay karong Oktubre 22, 2012. (/EIM) (BANATNEWS)