Mag-uuma suportahan sa DA

CEBU, Philippines - Ang Cebu City Department of Agriculture naningkamot nga kasuportahan ang panginahanglan sa mga mag-uuma sa bukirang bahin ning dakbayan ilabi na sa taga Sudlon I ug Tabunan.

Kini dihang nasuta nila nga laglom kaayo og mga lupot ug tag-as ang kabungtoran sa mga kaumahan didto ug maglisud ang mga mag-uuma sa paghatod sa ilang mga produkto sa merkado.

Gumikan niini nagpataod sila og usa ka tramline nga maoy kargahan sa mga produkto sa kaumahan sa mga kabungtoran sa Sudlon 1 ug Tabunan aron makaabot ngadto sa highway.

Gikan sa highway sayon nalang ang paghatud niini ngadto sa mga satellite market nga giila sa DA. Sumala pa ni Apple H. Layon, Municipal Agricultural Officer sa Cebu City Agriculture Department nga ang maong Agricultural Tramline kakargahan  og 500-600 ka kilo nga utanon ug uban pang produkto sa kaumahan nga molanat lang og 6 minutos ang pagguyod niini sa tramline paingon ngadto sa highway .

Ang maong tramline gikutay gikan sa bungtod diin mahimutang ang highway ngadto sa pikas bungtod sa gilay-on nga kapin kon kulang usa ka kilometro.

Lahi sa manu-mano nga biyahe nga molanat og duha ka oras gikan sa kaumahan una makaabot sa highway ang mga kargamentong utanon ug uban pang proudkto sa kaumahan.

Gibutyag ni Layon nga adunay gidestinong driver ang maong tramline nga mao si Joseph Pantilan nga membro sa Napayran Farmers Association sa Sudlon I.

Hinuon sa pagkakaron naabiriya ang maong tramline kay napunder ang bateriya ug kun mapalitan kini makaandar na uban kining maong kahimanan. Ang mga produktong kasagarang itumod sa mga mag-uuma mao ang mga high value vegetable sama sa sayote, sili ug lettuce. Giandam karon sa kagamhanan ang P40 milyones ang pundo nga igahin alang sa Cebu City of Agriculture alang sa pagpalambo sa mga kaumahan sa mga bukirang barangay sa tuig 2013. (/WC) (BANATNEWS)