LP sa Sixto Distrito solido na Quisumbing

CEBU, Philippines - Nangangkon ang Liberal Party sa sixto distrito nga solido na ang ilang grupo tungod sa pagtapon kanila ni Cordova Mayor Adelino "Addy" Sitoy.

 Matud pa ni Cebu 6th District Congressman Luigi Quisumbing dako og ikatabang ang pagbalhin ni Sitoy sa ilang partido.

Si Sitoy mao nalang untay bugtong sakop sa One Cebu sa ikaunom nga distrito kung wala pa kini motapon sa miaging adlaw.

Si Sitoy mipadayag nga mipatigbabaw ang panaghiusa sa ilang pamilya hinungdan nga kini nakadesider nga mobiya sa One Cebu Party gumikan kay dili siya buot nga magkasungi ang ilang pamilya sa lungsod sa Cordova gumikan lamang sa politika.

Matud pa ni Sitoy kanunay silang managlahi ni PB Arliegh Sitoy og partido matag piniliay apan sa dihang miapil na ang iyang apo nga makig-atbang kaniya sa umaabot nga piniliay dili niya kini madawat.

Giangkon ni Sitoy nga dako siya og pasalamat sa mga mihuras ug pabor nga iyang nakuha gikan sa One Cebu party nga nakapalambo sa lungsod sa Cordova.

Ang mga Ouano sa Mandaue, si Mayor Jonas Cortes sa Mandaue, Consolacion Mayor Teresa Alegado, ug ang pagtapon ni Sitoy maoy nagpasolido sa LP sa maong distrito.

Karong Sabado Septiyember 15 gikatakdang mohurar sa LP si Sitoy uban sa mga opisyal nga mitabok na usab sa maong partido. (/EIM) (BANATNEWS)