SIM card angay irehistro - NTC

CEBU, Philippines - Gipaningkamotan sa National Telecommunications Commission (NTC) nga mabalaod nga tanang mopalit og SIM card sa cellular phone marehistro sa goberno aron mabantayan batok sa pangabuso ug nagpatabang sila sa taga media paghangyo sa kongreso kalabot niini.

Mao kini gibutyag ni manlalaban Allan Macaraya, tigpamaba sa NTC7 kinsa miingon nga dugay na nilang giduso ngadto sa kongreso ang ilang resolusyon ug rekomendasyon kalabot sa maong katuyoan, ugaling lang wa kini tagda sa mga magbabalaod sa nasud.

Matud pa ni Macaraya nga usa sa resulta ning kakulang sa balaod bahin sa pagparehistro sa   SIM card, mao ang kakuwang sa cellphone directory ug ang paggamit sa cellphone sa mga binuang sama sa pagpangilad.

Matud pa niya nga daghang mga babaye nga nalugos tungod kay ang ilang kontak sa cellphone nga nagpaka-aron ingnong maayo , usa diay ka rapist.

May mga nailad   tungod kay ang ilang kasabot sa cell phone mangingilad diay ug tulisan busa wala sila makapadakop tungod kay wala sila makaila sa nangilad kanila. May gipatay tungod sa cell phone tungod kay ang iyang kakontak daan nga nagdumot kaniya ug sa pagtagbo nila gideretso siya pagpatay.

Miingon si Macaraya nga kini ug daghan pa nga binuang nakapaaghat sa NTC sa pag-awhag sa kongreso nga mogama og balaod nga kinahanglang  irehistro ang matag tag-iya sa numero sa cellphone aron dali rang mapangita ug matumbok sa mga otoridad kun kini magbinuang.

Apan matud pa ni Macaraya nga makapasubo kaayo tungod kay nasabtan nila nga mura og walay gana ang mga magbabalaod sa nasud sa paggama og balaod bahin ning maong isyu.

Gumikan niini nahimong ilado ang nasud sa tibuok kalibotan tungod kay naangkon ang titulo niini karon ang text capital of the world ug naghitak ang mga SIM card nga baligya sa aseras nga anaa nay tag duha singko ang kabarato ug sayon kaayong gamiton sa binuang.

Midugang siya nga kun may ikatabang ang taga-media bahin niining maong isyu, gipanghinaot nila nga mosanong ang mga magbabalaod sa pagpanday og balaod bahin niini aron nga ma-regulate kining butanga. (BANAT NEWS)