Robredo miusab sa iyang flight

CEBU, Philippines - Nasuta nga naka-book sa usa ka commercial airline si Sec. Jesse Robredo gikan sa Mactan Cebu International Airport (MCIA) apan nausab ang plano niini ug miabang nalang sa private plane sa Aviatours aron direkta kining makauli sa ilang lugar sa Naga City, apan nahagsa ang maong abyon.

Sumala pa sa gipagawas nga pamahayag ni Secretary Mar Roxas sa Department of Transportation and Communications diha sa Official Gazette sa gobiyerno nga gikutlo niini gikan sa report ni MCIA-Authority General Manager Nigel Paul Villarete, miabot si Robredo ug mga kaubanan alas-3 sa hapon niadtong Sabado diha sa MCIA.

Ang grupo ni Robredo gikan mitambong sa opisyal nga pagbukas sa bag-ong Regional Training School sa kapolisan diha sa lungsod sa Consolacion ug pagkahuman milahos MCIA aron mosakay sa Cebu Pacific flight 5J572 balik sa Manila.

Base sa impormasyon gikan sa Police Center for Aviation Security 7 (PCAS-7)/DILG ug MCIA Public Affairs Division, si Secretary Robredo naka-book unta sa Cebu Pacific 5J572 balik sa Manila alas 3:50 p.m. nga flight.

Nag-Ilis og abyon

Apan sa wala hisayring rason giusab ni Robredo ang iyang plano ug nakadesider nga mosakay nalang og pribadong eroplano maong miadto kini ug mga kaubanan sa MCIA General Aviations diin magbase sa Aviatour Air.

Nasuta sa uwahing mga report nga nag-apas si Robredo nga makatambong sa awarding sa usa sa iyang mga anak sa Naga City kinsa midaog sa swimming competition.

Sumala pa nga alas- 3:06 p.m. mibiya ang twin engine Piper Seneca nga gipilotohan ni Capt. Jessup Bahinting nga mao usab ang tag-iya sa Aviatours Air; co-pilot nga Nepalese nga si Kshitiz Chand, ug ang pasahero mao si Robredo, ug aide-de camp nga si Police Chief Inspector June Paolo Abrazado.

May aberya

Pagka alas 3:30 sa hapon mi-text si Abrazado kang Sr.Supt. Ritchie Posadas, ang hepe sa PCAS-7 nga nakasinati og aberya ang usa sa propellers sa ilang abyon ug mobalik sila sa Cebu.

Dangtan ang pila ka minutos mihangyo si Abrazado nga magpa-rebook silang duha ni Robredo sa labing sayo nga flight gikan sa MCIA, tungod niini gi-rebook ang duha sa alas-5:05 p.m. sa Cebu Pacific 5J570 flight.

Emergency landing

Apan alas-4:20 p.m. subling gipahibalo ni Abrazado ang PCAS-7 ug ang DILG nga mag- emergency landing sila sa Masbate Airport. Gani si Abrazado dihang gipangutana kung madala pa ba kini mitubag og “Okey naman.” Apan mao na kadto ang katapusang komunikasyon ni Abrazado ug PCAS-7.

Ang katapusang komunikasyon sa piloto ug sa MCIA control tower mao ang pagpahibalo sa piloto nga may gihabugong 150 feet na sila ug padulong nang motugpa gamit ang instrument flight rules (IFR) sa Masbate Airport ug posibleng dili sila makatugpa sa runway tungod sa aberya.

Si Robredo, Bahinting ug Chand pabilin pang missing, samtang naluwas si Abrazado. Ang mga awtoridad padayon pa sa ilang search and rescue operations kagahapon sa hapon.

Maayong tawo

Nagplano karon si City Traffic Office Management board chairman Sylvan Jakosalem nga mahatagan og pasidungog life-saver award si Bahinting sa siyudad tungod sa kadaghan sa maayong nahimo niini sa siyudad.

Usa na niini ang libreng pagpagamit niya ning bag-ohay lang sa iyang abyon aron kuhaon ang anti-venom sa Camiguin Island aron itambal sa napaakan og kobra nga si Roland Aventurado kinsa naluwas na gikan sa tinong kamatayon. (BANAT NEWS)