Zoo keeper sa Cebu Zoo napaakan og kobra

CEBU, Philippines - Usa ka zoo keeper sa Cebu City Zoo sa sitio Sudlon sa barangay Lahug ang napakaan og kobra dihang iyaha unta kining dakpon diha sa maong suroyanan.

Ang napaakan mao si Ronaldo “Ronron” Aventurado, lumad nga taga Barili unom na ka tuig nga diha magtrabaho sa Cebu City Zoo isip assistant zoo keeper, ang talandugon ang kahimtang diha sa Cebu City Medical Center human mapaaki sa iyang pulsohan.

Matud pa sa iyang hepe nga si Giovanni Romarate sa pakighinabi sa Banat News sa telepono ang kobra nga nakapaak kang Aventurado gituohan niyang Philippine Cobra ug giklaro niyang dili kini binuhi sa maong zoo.

Sumala pa niya nga nag-ayo ang iyang mga sakop lakip na si Aventurado sa agianan sa mga tawo luyo sa tiket booth dihang dunay lumalabay nga misinggit og “bitin!bitin!”

Tungod niini daling miresponde si Aventurado ug kauban ug gisuwayan og dakop bisan sa pasidaan sa mga kauban nga lala ug dihadiha napaakan kini.

“Ayaw kompiyansa, unya wala man mopatuo,” matud pang Romarate nga mikutlo sa pasidaan sa kauban ni Aventurado.

Dihang nahipos na ang halas gimandoan ni Romarate si Aventurado nga hugasan og init-init nga tubig ug sabonan og maayo ang samad, apan giingong nagpunay og pasalig si Aventurado nga “ok ra ko father”.

Apan dangtan pila ka gutlo ang milabay nadunggan na lang nila si Aventurado nga miingon “dad-a ko ninyo sa hospital,” matud pang Romarate naluya si Aventurado.

Sumala pa ni Romarate gitauran og dextrose si Aventurado ug giingong mihubag ang pinaakan niini sa pulsohan samtang gipaabot pa ang tambal gikan sa Philippine General Hospital nga makapadala og anti-venom.

Si Romarate nagkanayon nga walay kobra nga gibuhi ang Cebu City Zoo, mao usab kini ang hinungdan nganong wala silay susamang medisina.

Ang anti-venom o anti-venin usa ka medisinang giandam gikan sa venom o hilo gikan sa mga malala nga halas sama sa King Cobra, ang venom i-inject kini sa mga kabayo, kanding o karnero tungod kay ang maong mga hayop immune o dili dutlan sa hilo sa halas.

Kinaiya na sa lawas sa kabayo, kanding ug karnero nga awtomatikong mopagawas og antibodies kontra lala sa halas nga natural nang naa kanila ug kini maoy kuhaon sa mga herpetologist o mga eksperto sa mga halas.

Usa sa dakong problemang giatubang karon sa nahitabo kang Aventurado mao nga walay tambal sa bisan asang tambalanan dinhi sa Sugbu kontra pinaakan sa halas. 

(BANAT NEWS)