Mag-uuma gipatay atubangan sa mga amigo

CEBU, Philippines - Patay ang usa ka mag-uuma nga giligid og dunggab sa iyang kontrang mag-uuma samtang paingon na untang mopauli didto sa bukirang bahin sa sitio Cayapokyapokan sa barangay Manlapay lungsod sa Dalaguete niadtong Miyerkules sa alas 8:30 sa gabii.

Ang biktima mao si Carlos Salariana, 26, nagpuyo sa maong lugar samtang ang suspek mao ang silingang si Budok Carulasan kinsa daling miikyas human sa krimen.

Matud ni PO3 Christopher Requina sa Dalaguete Police Station dihang nahinabi sa Banat News naglakaw pauli uban sa mga higala ang biktima dihang kalit nga mibutho ang suspek nga nagbitbit og kutsilyo. Pag-abot nila sa duol gitawag sa suspek ang biktima ug nagkanayon nga “Magdaug gyud ta ani ron!” Ug dihadiha gidunggab makadaghang higayon sa suspek ang biktima diha sa dughan atubangan sa tulo niini ka mga kauban.

Bisan samaron nakadagan pa ang biktima apan gigukod kini sa suspek ug giusban og dunggab sa bukobuko ug pagkahuman misibat palayo, apan dangtan pila ka oras nadakpan ra kini sa mga migukod nga kapolisan.

Personal nga panagbangi ang gitutukan nga motibo sa nahitabong krimen. ( /EIM)