Managpuyo gi-ambush usa patay

CEBU, Philippines - Usa ang patay ug laing usa ang naangol sa nahitabong pagpamanhig niadtong Biyernes sa gabii diha sa sitio Danao, barangay Valencia, dakbayan sa Carcar.

Patay na nga nadangat ngadto sa Carcar Emergency Hospital si Segundo Dayanan Jr., 66, kinsa nakaangkon og samad pinusilan sa walang tampihak samtang ang kapuyo niining si Angelina Ibanan, 50, nakaangkon usab og mga samad pinusilan sa walang bahin sa lawas ug walang paa ug nalandig sa tambalanan sa dakbayan sa Sugbo.

Ang duha parehong nagpuyo diha sa barangay Esperanza, lungsod sa Aloguinsan.

Ang kapolisan sa dakbayan sa Carcar pinangulohan ni Inspector Ian Paul Arapols daling miresponde sa maong hitabo.

Si PO2 Rosendo Binondo kinsa maoy imbestigador sa insidente nga nahinabi sa Banat News kagahapon mibutyag nga si Dayanan sakop sa anticrime group nga Lungsod Batok Salaod (LUBAS) sa Aloguinsan.

Matud niya nga usa sa ilang gisentro karon nga motibo sa insidente mao ang personal nga bangi sanglit biyudo na kini samtang si Ibanan buwag sa bana apan nagpuyo sulod na sa napulo ka tuig.

Sa wala pa mahitabo ang pagpamanhig si Dayanan gikan sa barangay Poblacion ug miadto sa sitio Danao aron kuhaon si Ibanan nga nanglaba sa atabay tungod kay hugaw ang atabay sa ilang gipuy-an sa Aloguinsan.

Ang mga biktima sakay sa motorsiklo paingon na untang mopauli sa Aloguinsan dihang kalit gipamusil sa wala mailhing kriminal.

Unom ka buto sa armas ang nadungog sa mga molupyo ug sunod nilang nakita si Ibanan nga nagdagan ug nangayo og panabang.

Ang kapolisan nakakuha og back pack sa crime scene nga nasutang ila sa mga biktima nga may sulod nga hilaw nga mani, charger sa cellphone ug subpoena sa kasong estafa ug swindling nga gipasaka ni Dayanan diha sa Carcar City Prosecutors Office apan wala makuha sa polis ang pangalan sa gipangkiha ni Dayanan. – (BANAT NEWS)