Balay ug pumpboat gusbat natumbahan sa lubi

CEBU, Philippines - Balay ug pumpboat ang nagusbat human kini matumbahi sa duha ka punoan nga gilamba sa kusog nga hangin didto sa Sitio Alang-Alang, barangay Daanlungsod, lungsod sa Alcoy alas 12:00 sa miaging kaadlawon.

Ang balay nga napayhag gipanag-iya sa magtiayon nga Arnulfo Tampus ug Leonila, samtang ang tag-iya sa pumpboat mao si Paterno Cecillo, 50, pulos mga mananagat, nga managsilingan sa maong lugar,

Ang danyos sa balay nga gama sa gaan nga mga dapat mikabat og P10 mil , samtang P6 mil usab ang kantidad sa pumpboat.

Si PO1 Leon Gesim sa Alcoy Police Station mibutyag sa Banat News nga si Kapitan Manolito “Macky” Anoba sa barangay Daanlungsod uban nila ni Tampus ug Cecilio maoy mipa-blotter sa maong hitabo.

Nasayran nga samtang nangatulog si Tampus uban ang iyang asawa ug unom ka mga anak kalit miunos dayong paka sa natumba nga punoan sa lubi nga midat-og sa ilang balay ug hingpit kining napayhag.

Maayo na lang kay wala mosentro   ang lawas sa lubi sa ilang higdaanan hinungdan nga walay naangol bisan usa   kanila.

Pagkataud-taod laing punoan sa lubi na usab ang mipaka ug didto molamba sa pumpboat ni Cecillo   nga maayong pagkapikas.

Si Kapitan Anoba kagahapong adlawa maoy miuban nila ni Tampus ug Cecillo nga nangayo og ayuda kang Mayor Nicomedes delos Santos sa Alcoy. (BANAT NEWS)