Yayoy mag-Board Member sa unang distrito

CEBU, Philippines - Si Konsehal Raul “Yayoy” Alcoseba sa dakbayan sa Sugbo nagplanong molansar pagka-board member sa unang distrito. Si Alcoseba kinsa last term na karon sa iyang termino isip konsehal sa dakbayan sa Sugbo mibutyag nga ang iyang kagikan naggikan sa dakbayan sa Carcar nga nasakop sa unang distrito.

Matud ni Alcoseba nga kung mapili siyang bokal sa unang distrito ang benepisyo sa mga Barangay Health Worker (BHW), kababayen-an, senior citizen ug mga tanod maoy iyang unang atimanon.

Si Alcoseba kinsa alyado sa Liberal Party nagkanayon nga ang paghatag og benepisyo sa mga senior citizen sa dakbayan sa Sugbo mahimo usab kini sa probinsiya tungod kay adunay dakung pundo usab ang panudlanan sa probinsiya.

Gibasehan ni Alcoseba ang State of the Province Address (SOPA) ni Gobernador Gwendolyn Garcia nga ang probinsya dunay P700 milyones nga surplus.

Si Alcoseba nagkanayon nga ang mga benepisyo sa senior citizen, BHW, tanod ug kababayen-an wala kaayo mahatagi og pagtagad karon sa probinsiya.

Ang mga BHW maoy daling tawagon kung dunay mga masakit o manganak sa ilang sitio ug nagdawat lang kini og P500 ngadto sa P700 nga honorarium.

Samtang ang mga tanod kasagaran mabutang sa delikado diha sa ilang mga barangay pagmentenar sa kahapsay ug kalinaw apan gamay lang usab kaayo ang nadawat nilang honorarium ug gani wala pay mga benepisyo sama sa insurance.

Ang honorarium sa BHW ug tanod nag-agad kini kung pilay mahatag sa barangay ngadto kanila ug si Alcoseba nagkanayon nga pwede kining magahinan og budget sa probinsiya.

Gawas sa mga benepisyo sa BHW, tanod, senior citizen ug kababayen-an si Alcoseba nagkanayon usab kini nga tutokan niya ang agrikultura sa probinsiya aron dunay mga panginabuhian ang mga taga probinsiya.

Ang mga taga bukid molugsong sa siyudad aron mangita og panginabuhian tungod kay walay klarong suporta sa pagpalambo sa agrikultura.

Si Alcoseba midugang nga ang mga taga probinsiya nga moanhi sa siyudad dunay mga dagku kaayong luna nga pwedeng tikaron apan kawang lang tungod kay walay mitabang kanila aron maugmad ang ilang mga lote.

Si Alcoseba malaumon kini nga mapili isip bokal sa unang distrito sa umaabot eleksiyon sa sunod tuig. (BANAT NEWS)