Ambush 1 patay

CEBU, Philippines - Patay ang usa ka konduktor ug duha ang naangol apil na ang kagawad sa usa ka barangay human gi-ambusan sa armadong grupo ang ilang motor nga gisakyan sa hilit nga lugar sa sitio Nabara, barangay Kanhabagat lungsod sa Medillen niadtong Lunes sa alas 3:45 sa hapon.

Ang biktima nga namatay mao si Feljun Arrabis, 27, taga molupyo sa barangay Paypay lungsod sa Daanbantayan ug konduktor sa Ceres bus, samtang ang duha nga naangol mao ang iyang ig-agaw nga si Alvic Arrabis Inot, barangay kagawad sa Pajo, Daanbantayan.

Ang ikatulo nga naangol mao si George Camay, 29, taga Buayohan barangay Caputatan Sur sa lungsod sa Medillen.

Ang kapolisan padayon pa sa pag-ila sa duha ka mga lalaking mipusil sa mga biktima nga daling nangikyas.

Matud ni SPO4 Carlos Condeno, imbestigador sa Medillen Police Station dihang nahinabi sa Banat News gikan sa panimalay sa usa ka William Mercader sa maong lugar ang manag-agaw ug padulong nang mamauli.

Samtang si Camay kinsa gikan nagsukod sa ipahimong bintana ni Mercader padulong na pud nga mouli ug maoy giangkasan ni Feljun kay na-flat ang motor ni Alvic.

Ang duha ka motor nagsunod nga nagdagan paingon na pauli diin nag-una si Alvic apan pag-abot sa maong lugar duol sa katubhan kalit mibutho ang duha ka mga lalaki ug mipaulan kanila og bala.

Si Alvic naigo sa tuong tiil apan nakapasirit og padagan sa iyang motor palayo apan girapido usab ang nagsunod nga motor ni Camay ug naigo kini sa abaga apan si Feljun nga nag-angkas kaniya naigo kaduha sa bukobuko.

Human maigo nakalayat pa si Feljun ug midagan ug nagpunay pagpangayo og tabang apan nahagba kini sa dalan ug namatay.

Ang duha ka mamumuno namalik og sum-ok sa katubhan ug wala na maabti pa sa kapolisan, ang mga biktima nga daling gidala sa tambalanan apan patay na si Feljun.

Nakuha diha sa crime scene ang walo ka basiyo sa kalibre .45 ug usa ka buhing bala sa susamang kalibre nga gituohang gigamit sa mga mamumuno. Gisusi usab sa kapolisan ang nahipos nila nga report nga si Alvic maoy target sa mga mamumuno tungod kay gihulagway kining daghan og kontra sa lugar. (BANAT NEWS)