Mga instructor giwarningan

CEBU, Philippines - Higpit nga gipasidan-an sa National Police Commission (NAPOLCOM) ang tanang mga police instructor nga dili managmal sa mga police trainee.

Ang maong pasidaan gihimo ni manlalaban Zandro Oriol sa NAPOLCOM7 human madawat ang reklamo sa pito ka police trainee kinsa wala na makaantos sa pagpunay og latigo kanila og lipak nga kawayan matag higayon nga mosipyat sila sa ilang bansay-bansay

Gipasabot ni Oriol nga ang gitugot nga silot ngadto sa mga police trainee nga dili makatuman sa gitahas kanila nga gimbuhaton mao ra ang pagpa -push up, pagpa- jogging niini ug uban pang bahin sa ehersisyo sa lawas nungka nga dagmalan pinaagi sa latigo.

Giklaro   usab ni   Oriol nga sa pagkakaron gipaabot na lang nila ang resulta sa medical certificate sa pito ka police trainee sa Camp Ceferino Genovia sa barangay Bahay lungsod sa Sibonga aron makabuylo na ang ilang imbistigasyon.

Sumala ni Oriol nga mamiligrong mag-atubang og bug-at nga silot ang gireklamo nga tulo ka police instructor kun masuta nga adunay probable cause ang ilang pagpanagmal tungod kay kalapasan kini sa Anti Hazing Law nga usa ka kasong administratiba diin ang labing bug-at nga silot nga ipahamtang kanila   mao ang pagkatangtang gikan sa serbisyo, o kaha demosyon sa ilang ranggo o pagpahamtang og 90 ka adlaw nga suspension.

Giklaro usab ni Oriol nga wala na kinahanglana pa ang pagpatuman sa preventive suspension human ang hepe sa Police Regional Office (PRO-7) mimando dayon sa pagparelibo sa maong mga police instructor   kansang mga ngalan gipugngan sa kapolisan.

Ang pito ka mga police trainee kinsa nagpa blotter sa Sibonga Police Station daan nang nakaduso og pormal nga reklamo sa NAPOLCOM kinsa gipahibawo nila nga pirme lang silang latigohon og lipak sa kawayan inig kasayop nila sa ilang bansay-bansay.(/WC)   (BANAT NEWS)