Mipatay sa sikyu sikop

CEBU, Philippines - Usa sa suspetsadong midunggab patay sa usa ka gwardiya ug miangol sa laing kauban niini sa Santa Lucia Subdivision sa barangay Candulawan, dakbayan sa Talisay nasikop sa nagpatrolyang mga polis niadtong Martes sa hapon didto sa sitio Tiago, barangay Tabunok sa nahisgutang siyudad.

Ang nagtingkagol karon sa prisohan mao si Jimmy Abendan, hingkod, nga taga Candulawan, sa maong dakbayan, kinsa suspetsado sa pagdunggab patay kang Alejandro Masellones, usa ka security guard ubos sa NIMA Security Agency kinsa nadestino sa nahisgutang subdivision sa miaging buwan.

Si Joel Pareja nga kauban ni Masellones naangol human kini bunali og gahi nga butang ni Abendan ug George Casas nga iyang kauban sa maong higayon.

Sila si SPO1 Mikie Espina, SPO1 Ricardo Balbutin ug PO3 Romualdo Torregosa sa Special Reaction Unit (SRU) maoy nakasikop kang Abendan didto sa karsada sa sitio Tiago.

Si Espina nga nahinabi sa mga tigbalita kagahapon mibutyag nga niadtong higayona nagpatrolya sila sa kadalanan dihang nabantayan nila nga adunay migimaw nga pul-an sa kutsilyo sa tuong bahin sa hawak ni Abendan hinungdan nga ila kining gisita ug nasakmit nila ang 12 pulgadang gitas-on sa        kutsilyo.

Matud ni Espina nga si Torregosa kinsa molupyo sa Candulawan nakaila kang Abendan ug aron masiguro gipangutana nila ang ngalan niini.

Diha-diha human motug-an sa iyang ngalan gidala nila kini sa police station sa barangay Poblacion ug gitawagan nila ang mga witness sa nahitabong pagpatay sa gwardiya.

Ang duha ka mga saksi positibong mitumbok kang Abendan nga usa sa mga suspetsado.

Matud usab ni Espina nga si Abendan giingong miangkon sa kalambigitan niya sa hitabo apan namasangil kini kang Casas nga maoy midunggab kang Masellones samtang siya (Abendan) maoy mibunal sa nawong ni Pareja.

Si Casas padayon pa nga gipangita sa kapolisan.

Gibutyag ni Espina nga na-recover nila ang shot gun sa mga guwardiyang biktima ug ang mga bala gikan sa kanhi amo ni Abendan nga si Jimmy Alferez, 35, nga taga barangay Tabunok, Talisay.

Matud usab ni Espina nga gitugyan ni Alferez ngadto kanila ang maong shot gun ug wala siya’y kalibotan kung diin makuha sa suspetsado tungod kay igo lang kining gibilin kaniya.

Si Abendan ug Casas nag-atubang og kasong murder ug frustrated murder.

Gawas sa maong duha ka kaso si Abendan mag-atubang usab kini og kasong paghupot og hinagiban nga makamatay. (BANAT NEWS)