Bayaning Bisaya itudlo sa High School

CEBU, Philippines - Ang Anti-Vandalism Czar sa kagamhanan sa dakbayan sa Sugbo motudlo bahin sa Bayaning Binisiya sa mga tinun-an sa first year college sa mga publikong tunghaan isip kauban sa ilang kampanya pagsumpo sa bandalismo dinhi sa Sugbo.

Kini ang gibutyag ni Atty. Clarence Paul Oaminal, ang Anti Vandalism Czar sa Banat News kinsa nagkanayon nga ang Bayaning Binisaya nga lektura iyang isingit   sa mga subject nga Social Studies ug sa Philippine History.

Matud ni Oaminal   nga nakig-alayon na siya sa Department of Education (DepEd)E Cebu City Division alang sa implementasyon niini.

Gipasabot ni Oaminal nga dako kini og ikatabang pagsumpo sa bandalismo tungod kay itudlo sa mga tinun-an ang paghandom sa atong mga bayaning Filipino nga Sugboanon kansang mga ngalan napatik sa kadalanan nga gihugaw-hugawan karon gumikan sa bandalismo.

Gitumbok ni Oaminal ang sama sa mga dalan C. Padilla, T. Padilla, ug F. Llamas Street ug uban pa nga pulos mga ngalan sa ilado ug popular nga rebolusyonaryo sa pagkahimong siyudad sa Sugbo.

Nunot niini gipahibawo usab ni Oaminal nga nagpadayon karon ang gilusad nila nga Brigada Hapsay Sugbo   nga gisugdan niadtong Mayo 21, 2012 pinaagi sa pagpamintal ug pagpanglimpyo sa Mambaling Elementary School pinaagi sa pagpapas sa mga gisuwat-suwat sa mga pader sa maong eskuylahan.

Lakip usab nga nahinloan gikan sa pag-vandal mao ang dalan sa Tomas Abella og Mambaling Sports Center.

Matud ni Oaminal nga matag semana nila kining himuon uban sa abag sa mga sakop sa Cebu City Police Office (CCPO) gikan sa alas 6:00 sa buntag hangtud sa alas 9:00 sa buntag.

Si Mayor Micheal Rama mitudlo kang Oaminal nga maoy mangulo sa kampanya batok sa bandalismo aron pagpapas sa mga suwat-suwat ug uban pang matang sa panghugaw-hugaw sa mga kadaplinan ug tunga-tunga sa mga kadalanan sa nagkalainlaing lugar niining dakbayan sa Sugbo. (BANAT NEWS)