Mitulis sa lending firm nailhan

CEBU, Philippines - Gisusi sa kapulisan sa siyudad sa Toledo ang usa sa duha ka empleyado sa magtiayong negosyante nga gitulis niadtong Huwebes sa udto sa Sitio Luray I, Barangay Poblacion, dakbayan sa Toledo.

Si Supt. Henry Biñas, hepe sa Toledo City Police Station, mibutyag nga adunay duha ka-empleyadong gitaktak ang magtiayon niadtong Disyembre ug sayo ning tuiga.

Ang duha pulos taga Negros Occidental nagtrabaho kaniadto sa usa ka beach resort sa Pinamungajan nga gipanag-iya gihapon sa biktimang magtiayong Alfredo Yap, 68, ug Lydia, 64, taga Barangay Pandacan, Pinamungajan.

Ang empleyado nga gitaktak niadtong Disyembre giingong nahibaw-an sa magtiayon nga tiggamitan og gidiling druga samtang ang usa gipapahawa human nakahimo og kalapasan apan walay gibutyag si Biñas nga rason.

Ang mga ebidensiya nga na-recover sa luyong bahin sa opisina mao ang bag nga adunay sulod nga ticket sa barko nga giingong gisakyan sa tulisan gikan Negros Occidental paingon sa Sugbo ug T-shirt nga matud pa iya sa usa sa mga empleyado.

 “Mao na nga personalities among gitan-aw pero wa namo gisalikway ang uban,” matud ni Biñas sa pakighinabi sa Banat News.

Ang tulisan wala na karon sa Toledo City apan si Biñas mipasalig nga padayon ang ilang gihimong imbestigasyon labi na sa pag-secure sa possible exit points sa lugar.

Kahinumduman nga niadtong Huwebes sa udto nakuha gyud ang P10,000 sa magtiayon human tulisa sa nag-inusarang tulisan nga midala pa sa sakyanan sa magtiayon. (BANAT NEWS)