Tanod nalumos sa sapa

CEBU, Philippines - Namatay ang usa ka barangay tanod human matagak sa pangpang ug mitugpa sa sapa busa nalumos didto sa barangay Balas, lungsod sa Moalboal niadtong Domingo sa alas 6:00 sa buntag.

Ang biktima mao si Cresencio Paquera, 60 , tanod sa Balas.

Si Insp. Rogelio Amoroso, hepe sa Moalboal Police Station mibutyag sa Banat News nga gikang namiyesta ang biktima sa bukirang sitio sa   Balas ug mipauli nga hubog. 

Gumikan kay lipong, sa dalan   nadakin-as kini sa pangpang ug natagak sa sapa tungod sa maong pangpang hinungdan sa iyang pagkalumos.

Matud ni Insp. Amoroso   nga adunay samad sa ulo ang biktima nga gituohang napantok sa bato nga usa usab sa labing nakadaot sa iyang kinabuhi sa maong higayon.

Gituohan sa kapolisan nga nakuyapan na ang biktima sa wala pa kini matugsaw sa sapa hinungdan nga wala na siya makabaton og kusog nga masalbar pa gikan sa kamatayon.

Gisalikway sa kapolisan ang posilidad nga adunay foul play ang kamatayon niini. (/WC)  - BANAT NEWS