Carl Vinson gilubong na

CEBU, Philippines - Nagbaha ang panon sa katawhan sa paglubong ni Carl Vinson Apura, anak sa mayor sa dakbayan sa Carcar didto sa Visayas Memorial Garden kagahapon.

Sa misa nga gidumala ni Msgr. Rolando Geminez mipabuhagay    si Mayor Apura sa iyang kasubo sa kamatayon sa iyang anak nga giingon niyang usa ka paraygon, ug caring nga pagka-anak.

Gihulagway ni Apura nga usa ka dakong unos nga mihapak sa ilang pamilya ang nahitabo sa iyang anak.

Miingon siya nga nakapahugno sa iyang pagbati ang maong hitabo pero di na niya mabalik ang kinabuhi sa iyang anak’ hinungdan nga iya nalang dawaton ang kamatuoran.

Nagpasalamat usab og dako si Apura sa katawhan ug sa iyang mga konstituwente nga miduyog kaniya sa pagbangutan sa kasub-anan.

Sa dayon nang tunod sa lubnganan ni Carl Vinson, migahub sa mga danguyngoy ang palibot sa sementeryo   gikan sa mga kaliwat, higala, ug mga kaila sa namatay’ng batan-on nga Apura.

Samtang ang inahan ni Carl nga si barangay Kapitan Mercidita Apura sa Valladolid natumba sa hilabihang kasubo samtang nagpaingon na kini sa lungon sa kamanghoran niyang anak.

Ang kanhi presidente sa Alpha Kappa Rho nga si Richard Buscayno nga mitambong usab sa maong haya, mibutyag nga dako kaayong kawad-on sa ilang grupo ang kamatayon ni Carl Vinson ilabi na sa Carcar Chapter.

Matud pa ni Buscayno nga daghan kaayong mga proyekto nga gisuportahan si Carl Vinson ug daghan usab siyang gikatampo sa mga proyekto sa Akhro sa syudad sa Carcar hinungdan nga sila maoy giusikan sa pagkawala ni Carl Vinson.

Samtang si 1st Rep. Eduardo Gullas, ang apo niini nga si Gerard Anthony Gullas ug si Board Member Julian Daan uban sa iyang asawa kauban usab sa mga mitambong sa lubong ni Carl Vinson.

Sa laing bahin, kauban nga mibantay sa seguridad sa paglubong ni Carl mao ang Special Reaction Unit (SRU), mga kapolisan sa silingan lungsod, ug kapolisan sa syudad sa Carcar.

Si PO3 Roland Chavez sa Carcar police mibana-bana nga mikabat sa dul-ang 4 mil ka tawo ang mitambong sa maong lubong ni Carl Vinson. (BANAT NEWS)