Giluba sa kanhi kapuyo sa inahan

CEBU, Philippines - Usa ka lalaki ang gidunggab patay sa kapuyo sa inahan niini atol sa ilang panaglalis samtang nag-inom ang duha sa barangay Cadaruhan lungsod sa Borbon niadtong Miyerkules sa alas 6:00 sa gabii. Ang biktima mao si Aquino Gujo, samtang ang suspek mao si Regino Arellano, 56, kapuyo sa namatay nang inahan sa biktima. Matud ni PO2 Teogenes Flores Jr., sa Borbon Police Station sa Banat News nag-inom ang duha dihang nagkalalis dihang gipangayoan sa suspek ang biktima og sin nga atop sa ilang balay. Ang biktima nakaangkon og samad dinunggaban sa bukton, tuong paa ug ibabaw ngta bahin sa hawakan. Patay na kini pag-abot sa Juan Dosado Memorial Hospital. Ang suspek nadakpan human sa hitabo. (BANATNEWS)