Local World Youth Day karon

CEBU, Philippines - Pormal na nga buksan karong adlawa ang tinuig nga Local World Youth Day kung diin usa sa mga highlights niini ang enthronement ni Beato Pedro Calungsod.

Nasayran nga moabot ngadto sa 12 ka parokya sa siyudad sa Sugbo ang mosalmot nga tambongan sa kapin sa 4 mil ka pilgrims gikan sa nagkadaiyang parokya sa Visayas ug Mindanao. Mihatag usab sa ilang partisipasyon ang pipila ka archdiocese gikan sa kaulohan.

Ang over-all chairman sa maong kalihukan nga si Ian Rey Pableo mipadayag nga usa ka tuig ang pagpangandam sa maong kalihukan ug kini motak-op karong Domingo sa kaadlawon atol sa Palm Sunday.

Si Cebu Archbishop Emeritus Ricardo Cardinal Vidal     maoy mangulo sa Santos nga Misa diha sa University of San Jose Recoletos –Basak Campus.

Matud pa ni Pableo nga ila gyud gigahinan og dakong oras si Calungsod sanglit kini man ang patron sa mga kabatan-onan ilabi na nga gikatakda na kini nga i-canonize karong Oktubre aron mahingpit nga mahimong usa ka santo.             

Ika-27 na kini ka tuig nga Local World Youth Day dinhi sa Sugbu nga langkoban sa pag-ampo, katekismo ug uban pang buhatunon sa simbahan.

Nasayran nga ang labing unang Local World Youth Day nagsugod ni Vidal.

Una kining gihimo diha sa Archbishop Palace sa Sugbu ug gumikan sa kalamposan niini gihimo na kini matag tuig.

Dugang pa ni Pableo nga ibalhin-balhin matag tuig ang venue sa LWYD nga gani sa miaging tuig didto kini ipahigayon sa Lungsod sa Argao.

Ang maong kalihokan karong tuiga nagtangag sa tema nga “Standing firm in faith doing all your work in love.”

Nagkanayon si Pableo nga hugot nga seguridad ang ipatuman sa kapolisan atol sa nahisgutang kalihokan gumikan sa kadaghang bisita nga mangabot dinhi sa Sugbo. (BANATNEWS)