Mipatay sa iyang maguwang gikasohan na

CEBU, Philippines - Gipasakaan na og kasong murder ang igsoon ug pag-umangkon nga miunay og patay sa 55 anyos nga mag-uuma gumikan sa bangi bahin sa yuta nga ilang gitikad didto sa bukirang bahin sa barangay Balaw, lungsod sa Barili niadtong milabay’ng Miyerkules sa alas 7:00 sa gabii.

Ang nagtingkagol na karon sa karsel sa kapolisan mao sila si Dioscoro Tao, 50, minyo, ug pag-umangkon niini nga si Lucio Tao, 22 , ulitawo , pulos mga molupyo sa maong lugar.

Ang suspek nga si Dioscoro, manghud sa biktima samtang ang suspek nga si Lucio pag-umangkon usab sa biktima.

Sila nadakpan sa hot pursuit operation nga gilusad sa kapolisan didto sa bukirang bahin sa Sitio Katap, barangay Balaw sa milabay’ng hapon.

Si SPO2 Zaldy Orillo, desk officer sa Barili Police Station mibutyag sa Banat News nga ang panagbingkil sa luna nga gitikad sa mga suspek nga prendado kanila maoy nagtumbok nga posibling hinungdan sa krimen. Nasayran nga nagplano ang biktima sa paglukat sa maong luna nga iyang   giprenda ngadto sa iyang igsoon ug pag-umangkon apan wala kuno kini mauyoni sa mga suspek.

Kini tungod kay maayo kaayo og tubo ang ilang mga tanom sa maong luna nga ilang gitikad busa dili sila gusto nga lukaton kini sa biktima.

Maoy hinungdan nga samtang naglakaw ang biktima paingon sa iyang balay gikan sa uma niadtong Miyerkules sa hapon nga naguyod sa iyang binuhing kanding, pag-abot niini duol sa iyang balay kalit kining gipaulanan og bala nga maoy nakaingon sa hinanali niining kamatayon.  (BANATNEWS)