Mga lumod sa Oslob isalida sa TV

CEBU, Philippines - Ang naila na nga mga WHALE SHARK kon mga lumod sa kadagatan sa lungsod sa Oslob, i-feature kon ipasalida sa Kris TV Summer Special sa ABS-CBN.

Kini ang gipahibawo sa Segment Director sa maong programa nga si Chiqy Lacsamana sa pakighinabi sa Banat News ug sa Sugbo Newsteam human sa ilang pagbisita sa Oslob uban ni Kris Aquino sa miaging adlaw.

Si Lacsamana miingon nga sama sa naandan, ilang napili ang Sugbo sa ilang Summer Special gumikan sa mga resort ug maanindot nga mga baybayon niini.

Hinuon wala niya ibutyag kun unsang petsaha ug adlawa masud-ong ang maong salida sa TV atol sa programa ni Kris.

Ang mga lumod nga maglabo sa kadagatan sa Oslob nahimong kalingawan sa mga turista nga moduaw sa maong lungsod.

Wala usab ikapasabot sa mga lumod kun nganong ganahan sila sa kadagatan sa Oslob, apan alang sa mga lokal nga mga mananagat ug mga opisyal sa maong lungsod , ilang gipahayag nga murag nahimo na nga pinuy-anan sa mga lumod ang maong lugar.

Ang mga mananagat sa Oslob nagkanayon nga ang mga isda sama usab sa tawo nga kaantigo mamili og lugar nga himoon nilang permanenting puy-anan .

Ang mga mapili nilang lugar mao kadtong giharian sa mananagat ug katawhan nga dili modaugdaog kanila, walay mga dinamitiro ug sa laktod pinangga sila sa mga lungsoranon.

Human mosuroy sa Oslob, si Kris, kinsa manghod ni Presidente Benigno “Noynoy” Aquino III nakigkita usab kanila ni Governor Gwendolyn Garcia ug Mayor Michael Rama.

Daghang mga butang ang ilang gihisgotan nga  may labot sa mga kalihokan nga puwedeng ipasalida sa iyang programa sa TV. 

Wala hinuon hisguti kun unsa pang mga programaha ni Gobernador Garcia sa lalawigan ug ni Mayor Rama sa dakbayan sa Sugbo ang ipasalida ni Kris sa iyang TV program, 

Mitambong usab sa maong panagtagbo si Dame Mariquita Salimbangon Yeung kinsa daghan usab og gikatampo sa mga gihisgotan sa popular kaayong TV host ug sa mga lokal nga opisyal ning lalawigan. (BANATNEWS)