Opisyal sa brgy gipa-insured ni Gwen

CEBU, Philippines - Gawas sa kapin 70 mil ka mga mangingisda ug mag-uuma lakip sa ilang mga kahayopan ug mga tanom sa kaumahan, ug mga miyembro sa Bantay Dagat sa kalungsoran sa lalawigan sa Sugbo, si Governor Gwendolyn Garcia mohatag usab og insurance ngadto sa dul-an 50 ka mga trabahante ug mga opisyal sa mga barangay sa probinsya.

Kini pinaagi sa subling pagtambayayong sa kagamhanan ug Philippine Crop Insurance Corporation (PCIC).

Sumala pa ni manlalaban Jovy Bernabe ang presidente sa PCIC nga laing hatagan og pasiguro sa gobernador mao ang mga volunteer worker ug opisyal sa barangay.

Sigun pa ni Bernabe nga mao ang nag-unang unod sa Supplemental Memorandum of Agreement nga bag-ohay lamang nga gipirmahan sa kagamhanan sa lalawigan sa Sugbo ug sa PCIC.

Si Bernabe miingon nga ang hingpit nga makabenepisyo sa insurance sa PCIC mao ang mga barangay official, tanod, lupon, barangay health worker, day care worker, barangay nutrition scholar, ug barangay animal health aids.

Midugang siya nga ang maong lakang sa kagamhanan sa lalawigan sa Sugbo gipaluyohan ni Undersecretary Bernadette Romulo-Puyat sa Special Concern sa Department of Agriculture kinsa kasamtangan usab nga PCIC Chairman of the Board nga miduaw dinhi sa Sugbo dili pa dugay.

Ang maong mga volunteer worker ug barangay official makapahimulos na sa PCIC Accident and Dismemberment Security Scheme human abagaha sa Kapitolyo ang P1.5 milyones nga premium nila.

Kahinumdoman nga ang maong mga molupyo daan nang gipasiguro sa gobernador sa Government Service Insurance System (GSIS) ug ang ilang insurance coverage gibalhin na karon ngadto sa PCIC.

Gumikan niini si Bernabe mipadangat sa iyang kalipay gumikan sa mabungahon nga panagtambayayong sa PCIC ug sa Kapitolyo. Nagpasalamat usab si Bernabe kang Gobernador Garcia tungod kay ang ilang panagtambayayong karon nahimo nang ehemplo ug modelo sa ubang mga probinsiya. (BANATNEWS)