Kagawad gidapigan sa mga kabarangay

CEBU, Philippines - Human malambigit ang pangan nga maoy nagpasiugda sa ‘tsunami scare’ tungod sa 6.8 magnitude nga linog niadtong Pebrero 6, si Kagawad Domingo Ando Jr., sa barangay Ermita mibalik kagahapon sa buntag sa Cebu City Police Office (CCPO) ug subling mihimakak sa mga alegasyon. Matud ni Ando nga naapektuhan sila ug ang iyang pamilya lakip na ang iyang pagka- politiko human gilambigit ang iyang pangan sa tsunami scare. Si Ando giimbitar sa kapolisan lakip na ang usa ka radio blocktimer tungod sa ‘tsunami scare’ niadtong milabay’ng semana human giingong adunay mga tawong mitumbok kanila nga maoy nagpasiugda niini.

Si Ando mikuwestyon sa mga reports sa media nga usa siya sa gipasanginlang nagpasiugda sa ‘tsunami scare.’Ang laing gipasanginlan nga radio blocktimer nga si Danilo “Danny” Cogtas gipasakaan na og kaso sa kapolisan bisan pa sa panghimakak niini. Ang mga empleyado sa barangay hall sa Ermita medepensa kang Ando ug miingon nga si Ando maoy nangulo sa pagpakalma sa mga tawo isip maoy ilang tsirman sa peace and order committee.

Si Percival Rivera, barangay hall custodian nagkanayon nga bisan ang ilang kapitan nga si Antonnieto Flores makasaksi sa gibuhat ni Ando sa maong adlaw.

“Wala mi nakadungog nga miingon si konsehal (Ando) nga ‘tsunami.’ Ang mga tawo hinuon gikan sa Pasil maoy unang nag-panic,” pagklaro pa niya.

Matud niya nga pipila ka oras human sa linog, miadto pa si Ando sa South Road Property aron susihon ang dagat apan sa pagbalik niini sa barangay hall nagsugod na og panagan ang mga tawo gikan sa Pasil nga nag- panic.

Si Rivera midugang nga si Ando misuroy sa kabalayan aron pakalmahon ang katawhan nga dili lang mag-panic.

Si Chief Insp. Romeo Santander, hepe sa City Intelligence Branch (CIB) sa Cebu City Police Office (CCPO) miingon nga ilang paabuton ang witness hangtud karung adlawa.

Apan kun wala gyuy moanha sa ilang buhatan, si Santander miingon nga dili na sila mopasaka og kaso ni Ando ug hunongon na usab nila ang imbestigasyon.

Si Ando gihulagway nga naapektahan gyud subay sa paghulagway sa pipila ka mga pulis dihang gilambigit ang iyang pangan nga usa sa mga “suspek.” Apan si   Santander, nagkanayon nga usa sa gipasanginlan sa mga saksi si Ando human sa insidente. Sa sayo pa, si Ando ug Cogtas hugtanong mihimakak sa pasangil dihang mipakita sila sa CIB sa miaging semana. (BANATNEWS)