Nangatulog girakrakan usa ang patay

CEBU, Philippines - Usa ang namatay ug grabeng naangol ang kauban niini human gipamusil sa duha ka wala mailhing armadong lalaking nagsakay og motorsiklo sa dalan Juan Luna sa barangay Looc, dakbayan sa Danao ala-una pasado ang takna sa kaadlawon sa miaging Domingo.

Ang namatay mao ang 17-anyos nga drayber sa traysikad samtang naangol usab si Jaime Seballo, 27, pulos nagpuyo sa barangay Look sa maong dakbayan.

Si PO1 Wendel Baritua sa kapolisan sa maong dakbayan nga nahinabi sa Banat News miingon nga nangatulog ang mga biktima sulod sa ilang traysikad samtang nagpaabot og pasahero dihang kalit nga girakrakan. Ang nag-angkas maoy namusil ngadto sa nangatulog nga mga biktima. Matud pa ni Baritua nga si Dayang naigo sa iyang dughan ug bukton samtang sa ubos sa walang dughan naigo si Seballo.

Ang duha gidala sa Danao District Hospital apan si Dayang nga nakabaton og grabeng samad ang gideklarar sa mga doktor nga dead on arrival.

Dali nga gibalhin sa Vicente Sotto Memorial Medical Center sa dakbayan sa Sugbo si Seballo tungod sa grabeng samad niini.

Padayon pa ang kapolisan pagtino sa motibo sa pagpamusil.  - BANAT NEWS