"Pusher" gipatay

CEBU, Philippines - Usa ka gidudahang ‘mamarukay’ ang gipusil patay sa dakbayan sa Sugbu kagahapon sa kaadlawon nga gituohang giunay pagpusil sa usa sa iyang mga kustomer atubangan sa iyang kapuyo diha sa dalan Alviola sa barangay Tejero ning dakbayan.

Ang biktima nailhan nga si Angelito Araneta alyas Gong-gong nga giingong ‘mamarukay og gidiling drugas sa maong dapit.

Samtang ang gitumbok nga mamumuno gihulagway lang nga 5’4 ang gitas-on, kulungon og buhok nga nagsuot og itom nga t-shirt.

Sa inisyal nga imbestigasyon sa kapolisan nasayran nga ang biktima hinanok na unta nga natulog sulod sa ilang panimalay uban sa iyang kapuyo nga si Vangie Adoro.

Giingong adunay misampit sa biktima hinungdan nga kini mibarog ug giablihan ang ilang pultahan apan kalit kining gisugat og bala sa mamumuno ug naigo diha sa ulo nga nakaingon sa iyang kamatayon.

Human sa maong panghitabo ang mamumuno daling midagan palayo sa maong lugar. Matud pa sa kapuyo nga si Adoro nga namay-ongan niini ang mamumuno kini tungod kay kaduha na kini nga miadto sa ilang panimalay.

Samtang ang imbestigador sa Cebu City Police Office, homicide section PO3 Ruth Violango mibutyag nga aduna sila’y duha ka anggulong gisubay.Kini mao ang kalambigitan sa ilegal nga drugas tungod kay sa ilang nakuha nga impormasyon giingong drug runner ang biktima. Laing gisubay nilang motibo mao ang kalambigitan sa biktima sa pagpusil patay sa usa ka barangay tanod niadtong tuig 2005.

Samtang usa ka Lico Abines, nga gituohang miyembro sa Crips gang ang talandugon ang kahimtang human gipusil sa nawong sa mga lalaking nagmotorsiklo diha sa sitio Magpalaser sa barangay Hipodromo ning dakbayan kagahapon sa hapon.

Ang kapolisan nagsusi pa sa motibo sa maong pagpamusil kung may kalambigitan ba kini sa nahitabong paglabay og granada sa banay sa biktima kaniadto.(/EIM) (BANATNEWS)