Gisuyaan giluba sulod sa videokehan

CEBU, Philippines -  Samaron ang usa ka ulitawo dihang gidunggab kini sa naglagot kaniya sulod sa videokehan sa sitio Masiwa, barangay Marigondon, dakbayan sa Lapulapu sa miaging gabii.

Ang biktima mao sila si Felix Baromeda Ortega, 20, nga taga Ibabao, Agus sa maong dakbayan samtang ang suspetsado mao si Ronald Panoncial Bonnie 30, ulitawo, lumad nga taga Campo 8 sa dakbayan sa Toledo.

Matud pa ni PO1 Liejie Vincent Gonzalve sa homicide section sa kapolisan sa maong dakbayan nga nag-inom ang duha sa sulod sa videokehan sa managlahing lamesa sa maong lugar.

Unya gika-table sa biktima ang duha ka mga sexy nga babaye nga gituohang maoy nakapalagot sa suspetsado nga naglingkod sa atbang nga lamesa sa sulod sa maong videokehan.

Samtang padayon sa ilang pag-inom ug pagkantakanta sa sulod sa maong videokehan ang suspetsado miduol sa biktima dayong dunggab niini pinaagi sa iyang kutsilyo.

Samdan sa liog ug dughan ang biktima ug gihatod dayon kini ngadto sa Lapulapu City Hospital apan gibalhin ngadto sa Vicente Sotto Memorial Medical Center sa dakbayan sa Sugbo.

Si PO2 Franklin Bolaquia sa homicide section sa kapolisan sa maong dakbayan miingon nga nadakpan hinuon nila ang suspetsado sa follow up operation nga ilang gihimo didto sa maong dapit ug kasamtangang gibalhog kini sa ilang detention cell samtang giandam na usab ang kaso nga ilang ipasaka batok niini. (WC)(BANAT NEWS)