Molupyo sa 2 brgy. sa Escalante gipabakwit

BACOLOD CITY, Philippines  — Giawhag sa Mines and Geosciences Bureau (MGB) ang mga residente sa sitio Baloc sa mga barangay Malasibog ug Paitan sa Escalante City, Negros Occidental sa paghiklin una human nila madiskubrehing peligro ang dapit diin sila mamuyo.

Si MGB-6 director Leo Van Juguan, sa suwat nga gipadala niini kang Governor Alfredo Maranon Jr. niadtong Enero 18, ang maong ahensya kusganong mirekomendar nga ibalhin ang mga residente sa Baloc sa mas luwas nga lugar.

Ang maong rekomendasyon sumala pang Juguan gibase sa memorandum report kabahin sa “Initial Findings on the Reported Land Fissure Observed at Sitio Baloc…” nga gihimo ni Engr. Leilani Suerte sa MGB-6, kinsa maoy nangulo sa pagsusi sa lugar niadtong Enero 14.

Base sa report ni Suerte, si Juguan mibutyag nga ang kabalayang gitukod diha sa kilid ug tiilan sa bukid pulos peligro sa landslides.

Ang MGB-6 mipadala og mga eksperto diha sa maong dapit human madiskubrehi ang pipila ka mga lugar nga miliki niadtong Enero 10, ang provincial social welfare officer nga si Liane Garcia, pinaagi sa Office of the Governor, maoy nanawag sa MGB-6 aron ipasusi ang maong dapit.

Niadtong Enero 16, 53 ka pamilya sa Baloc sa Brgy. Malasibog ug lima ka pamilya gikan sa Brgy. Paitan ang gipabakwit tungod sa nangliki nga yuta sumala pa sa report ni Suerte.

Gawas pa niini girekomendadr usab nga dili gamiton ang mga lawak saringan sa Malasibog Elementary School tungod sa mga liki nga nakita sa edipisyo ug sa lugar nga gitarukan niini. Girekomendar usab nga pabutangan na og signages ang maong lugar aron pahimangnoan ang publiko.

Dugang rekomendasyon mao ang higpit nga pagbantay sa kilid ug tiilang bahin sa Mount Solitario (Mt. Lunay) nga gikahimutangan sa sitio Baloc tungod sa nahitabong mga landslides niadtong nakalabay’ng bulan. (BANATNEWS)