Way makahilabot sa Senado-Enrile

CEBU, Philippines - "No one can interfere with us." Mao kini ang pamahayag ni Senate President Juan Ponce Enrile atol sa ikaupat nga adlaw sa impeachment trial batok kang Supreme Court Chief Justice Renato Corona.

Kini human usab ang Supreme Court midesisyon nga dili kini mopagawas og temporary restraining order (TRO) batok sa impeachment trial ug mihangyo hinuon sa Senado ug sa House of Representatives nga mosumitir og komento kabahin sa isyu sulod sa napulo ka adlaw.

Sumala pa nga adunay daghang petisyon ang nag-ungot karon sa Korte Suprema nga nagsupak sa maong impeachment trial ni Corona. Si Enrile sa interbyu sa mga tigbalita sa report sa GMA News.tv nagkanayon nga gikatakda pang mopadala og tubag ang Senado apan mipasabot nga "more or less" nakahibalo na ang Korte Suprema sa ilang tubag.

"My reading of the Constitution is that this is a special situation. We have the sole power to try and decide the case... meaning no one can interfere with us as long as we apply the Bill of Rights and the principle of due process," matud pa niini.

Gipasalig hinuon ni Enrile nga ‘neutral’ ang mga Senador bisan paman sa kritisismo nga pipila sa ilang mga kaubanang senador daw nangabugar sa habig sa prosekusyon.

"Let that impression be a function of the public. If they have that impression, then they can punish us," matud pa niini.

Kagahapon ang prosekusyon mipresentar sa ilang testigo nga si Carlo Alcantara gikan sa Quezon City register of deeds aron pamatud-ang nanag-iya og daghang mga kayutaan si Corona ug ang pamilya niini. (BANATNEWS)