Mag-uuma gitabangag'g patay sa mga kauban

CEBU, Philippines - Patay nang nakit-an ang lawas sa usa ka mag-uuma kinsa gipusil ug gidunggab sa iyang mga kauban sa trabaho didto sa Sitio Mayana, barangay Magsaysay, lungsod sa Balamban niadtong Martes sa buntag.

Ang biktima mao si Gebith Ardiente, hingkod, kasamtangang nagpuyo sa Sitio Sandayong barangay Sunog, Balamban, apan   lumad nga taga Kabaasan barangay Adlaon sa bukirang bahin sa dakbayan sa Sugbo, ug nagbantay sa yuta ni Alex Francisco Meno.

Samtang ang duha ka mga suspek mao sila si Regine Labajo ug Lindon Latayada, pulos hingkod ug mga kauban sa trabaho sa biktima.

Si SPO1 Julius Obanana sa Balamban Police Station mibutyag sa Banat News nga ang biktima kauban sa duha ka suspek ug   ubang mga kauban sa trabaho nag-inom sa bunk house niadtong Lunes sa gabii. Unya dihang nangalasbag na , nagkalalis tungod kay nahisgotan ang bangi nila sa milabay nga buwan.

Dihang miinit ang panaglalis, gitabangan sa duha ka suspetsado pagpusil ug pagpanunggab ang biktima.

Nakaangkon kini og samad pinusilan sa nagkalainlaing bahin sa lawas uban sa mga dinunggaban sa dughan ug tiyan apan wala dayon mamatay kay giingong nakadagan pa kini og mga 50 metros ang gilay-on gikan sa bunk house   diin siya   nalup-og ug namatay.

Ang duha ka suspek daling misibat human sa hitabo ug alas 9:00 na sa buntag nabangalan ni Roldan Latayada igsoon ni Lindon ang patay’ng lawas sa biktima.

Ang kapolisan padayon pang nagpangita karon sa mga suspetsado.  - BANAT NEWS