Nasunogan sa Jagobiao gitabangan

CEBU, Philippines - Mga biktima sa sunog sa sitio San Lorenzo Ruiz sa barangay Jagobiao, dakbayan sa Mandauepadayon nga nakadawat og hinabang gikan sa buhatan sa Social Welfare Office (CSWO) sa maong dakbayan ingon man ang Kapitolyo.

Si Lourdes Rivera, barangay treasurer sa nahisgotang barangay nga nahinabi sa Banat News miingon nga ang mga hinabang nga nadawat sa biktima mao ang mga ready to eat nga pagkaon, bugas,banig, habol ug uban pa.

Matud pa ni Rivera nga ang kapin sa 200 ka mga biktima temporaryo karong gipahiluna sa Jagobiao National High School nga maoy hinungdan sa temporaryong pagkasuspenso sa klase niini.

Si Jagobiao barangay Kapitan Editha Montesa inabagan sa buhatan ni Mayor Jonas Cortes nangita pa og laing lugar nga temporaryong butangan sa mga biktima aron mapadayon ang klase sa maong tunghaan.

Gipaabot nga ideklarar nga naa sa state of calamity ang maong barangay aron makapagawas sa calamity fund ang barangay ug ang siyudad samtang gisusi usab sa mayor kung makabalik og tukod sa ilang balay ang mga biktima.

Si SFO4 Roy Garcia, imbestigador sa kabomberohan sa maong dakbayan nga nahinabi sa Banat News miingon nga ilang ipatawag ang pipila ka molupyo aron sutaon ang hinungdan sa sunog. Giklaro usab ni Garcia nga ang mga bombero sa Consolacion Fire Station maoy unang nakaresponde sanglit sa ilang Standard Operating Procedure (S.O.P.) ang labing duol nga fire station kinahanglang mouna sa pagresponde.

Si Gob. Gwendolyn Garciamipadala na og 25 ka sakong bugas sa National Food Authority, de latang pagkaon, mga sapot, 50 ka habol ug 50 usab ka banig.

Matud pa ni Wilson Ramos, social welfare assistance sa Kapitolyo, nga pasiuna lang kini sanglit gisusi pa kung pila gyud ang naapektahan.

Base sa pasiunang listahan nga nadawat sa Provincial Social Welfare and Development Office, 132 ka tag-iya og panimalay samtang 139 ang mangabangay ug nangipon lang og pinuy-anan nga mga biktima sa sunog. (BANAT NEWS)