Masbate ug Leyte midaog tag P1milyon

CEBU, Philippines - Pormal na nga gipasidunggan kagahapon sa hapon ang tanang mananaug sa Sinulog Festival 2012 nga gitambongan gihapon sa liboang mga tawo diha sa Cebu City Sports Center sa pulta nga P100 diin nanayaw pagbalik ang tanang mga nakadaog. Ang gipasidunggan naglangkob sa Kulturang Placereño sa Placer, Masbate ug Tribu Lingganay sa Alang-alang, Leyte nga maoy mga kampeyon sa Sinulog 2012 alang sa kategoryang Sinulog Based ug Free Interpretation .

Ang nahisgutang mga grupo nanghakot usab og minor awards sama sa best in costume ug best in musicality.

Ang mga mananaog sa miaging tuig nga Sinanduloy Cultural Troupe sa Tangub City ug Tribu Himag-ulaw sa Masbate nahimutang sa ikaduhang pwesto sa maong duha ka kategoriya.

Samtang mikumpleto sa listahan sa mananaug sa Sinulog based category gikan sa ikatulo ngadto sa ikalima nga pwesto ang siyudad sa Carcar, Sta. Catalina sa Negros Oriental ug Abellana National School.

Ang ikatulo ngadto sa ikalimang puwesto sa Free Interpretation category nalangkat sa Karatong Festival sa Dulag, Leyte, Lumad Basakanon ug Toledo National High Vocational School.

Ang dakbayan sa Carcar mao usab ang kampeyon sa street dancing category samtang ang ikaduha ug ang ikatulong puwesto sa maong kategoriya naangkon sa Tangub City ug Kulturang Placereño. Ang executive director sa Sinulog Foundation Inc. nga si Ricky Ballesteros nagkanayon nga nagbaha karong tuiga ang mga lig-ong contingents nga mipakita og preskong klase sa presentasyon pinaagi sa mga bag-ong ideya nga nakapahugyaw sa mga tawo.

Ang mga kampeyon sa mga kategoryang Sinulog-Based ug Free Interpretation nagtangag sa premyo nga P1 milyon samtang P500,000 alang sa ikaduhang pwesto, P300,000 sa ikatulong pwesto, P200,000 sa ikaupat nga pwesto ug P100,000 sa ikalima nga pwesto. Gipasalamatan usab ni Mayor Michael Rama sa publiko sa gihatag nga kooperasyon sa selebrasyon maong malinawon ang pagsaulog sa kapistahan ni Senyor Sto. Niño. (BANATNEWS)