Devotee City may balaod

CEBU, Philippines - Gipasidan-an na ni Konsehal Roberto Cabarrubias ang mga tawo nga buot mopuyo sa Devotee City nga motuman sa balaod nga gipatuman sa maong lugar.

Ang Devotee City nga buksang pormal karong Biyernes maoy temporaryong kapuy-an sa mga deboto ni Señor Sto. Niño gikan sa nagkalainlaing dapit sa probinsya nga mamista sa dakbayan sa Sugbo apan walay kapuy-an dinhi.

Sumala pa sa konsehal nga ginadili ang pagpanigarilyo sulod sa Devotee City ug istrikto usab nga ipatuman ang pagbahig sa basura ngadto sa malata ug dili malata.

Dili usab puwedeng makasulod sa maong dapit ang mga ilimnong makahubog ,apan hinuon dali kaayong masakpan kung adunay makalapas sa maong balaod kay aduna man sila’y ipakatap nga mga kapolisan sa maong lugar ug may iinstalar usab nga security camera nga masud-ong sa tibuok kalibutan gumikan sa live stream.

Dugang pa sa konsehal nga dili puwedeng magdala og hayop sama sa iro, iring ug uban pa ang mga deboto ug gidili usab ang pagpamaligya sa unsa mang mga butang sa sulod sa maong dapit.

Ang Devotee City langkoban sa kaping 100 ka container van diin ang papuy-on niini mao lamang kadtong makapresentar og mga dokumento sama sa ID, ticket sa barko ug bus nga  gikan gyud sila sa ubang dapit.

Matud pa niya nga mokabat sa 2,000 ngadto sa 3,000 ka tawo ang makapahimulos niini ug gipatuman nila ang polisiya nga “first come, first serve”. Dili usab maproblema ang mga deboto kay hatagan man sila og   libreng tubig ug kuryente.   - BANAT NEWS