Wanted diay sa US ang usa sa dinakpan

CEBU, Philippines - Wanted diay sa America ang usa sa duha ka tulisang nasikop sa Cebu City Police Office (CCPO) nga magsakay og awto niadtong Martes sa buntag sa usa ka kan-anan ug imnanan diha sa eskina sa dalan Juana Osmeña ug Escario St., sa barangay Capitol Site siyudad sa Sugbu.

Kini maoy gibutyag ni Chief Insp. Romeo Santander, hepe sa City Intelligence Branch kinsa miingon nga dunay warrant of arrest (WOA) didto sa U.S si Eric Reyes alyas ‘Kano ’ nga taga Ayala Access Road sa barangay Kamputhaw.

Matud ni Santander nga ilang gisusi sa Homeland Security ang record ni Reyes ug ilang nasayran nga duna kini kasong pagpangawat ug pagpanulis didto sa America.

Sa pagkakarun ang kapulisan sa dakbayan sa Sugbu nagpaabot pa kung unsay lakang nga himuon sa gobiyerno sa America kung ila ba kini nga ipadala didto samtang padayon usab ang iyang kaso nga atubangon dinhi sa dakbayan sa Sugbu.

Nasuta usab sa kapulisan nga dili Eric ang tinuod nga pangalan niini kondili Michael Reyes, ang ngalang Eric pangalan kini sa iyang igsuon nga atua karun sa America .

Kahinumduman si Reyes nadakpan sa mga sakop sa Criminal Investigation and Detection Group (CIDG)-7 niadtong 2008 tungod sa kaso sa ilegal nga drugas ug Eric Reyes usab ang iyang gidalang pangalan niadto. (BANATNEWS)