Gullas nagpasalamat sa nanabang sa fund drive

CEBU, Philippines - Gibati og kaluoy dihang nakita sa telebisyon sa chairman sa The Freeman ug Banat News ug Executive Vice President sa University of The Visayas nga si Jose “Dodong” Gullas ang kahimtang sa mga nabiktima sa bagyong Sendong sa Mindanao.

Kini maoy hinungdan sa gipasiugdahan niyang fund drive sa tuyo nga matabangan ang mga nabiktima sa bagyo matud pa niini sa press conference kagahapon sa hapon.

Niadtong Disyembre 19, 2011 nalusad dayon ang The Freeman-Banat News Fund Drive Alang sa taga Mindanao nga nanawat og mga donasyon alang sa maong katuyoan.

Ang maong fund drive tapuson karong Enero 12, 2012 atol sa adlaw’ng natawhan sa amahan ni Gullas nga si Don Vicente Gullas.Si Gullas ang mapasalamaton kaayo sa mga mitubag sa panawagan nga mihatag og bahin sa ilang mga grasyang nadawat aron mapaambit ngadto sa mga naalaot sa katalagman.

Ang mga nadawat nga hinabang mao ang mga relief goods, mga bottled water, canned goods, mga habol ug cash nga miabot og P230 mil nga gisugdan na og bahin aron ipadala sa Iligan ug Cagayan.

Ang kwartang hinabang ipamalit og tambal nga gikinahanglan sa mga nabiktima ni Sendong.

Si Atty. Joseph Baduel sa UV Alumni Office kinsa usa sa gitahasan nga maoy modala sa mga hinabang didto mibutyag nga ang mga lokal nga opisyal sa Cagayan de Oro ug Iligan City mibutyag nga gikinahanglan kaayo nila ang mga tambal.

Sa iyang bahin, si Dr. Remedios Bacasmas nagkanayon nga ilang nasayran nga ubay-ubay na karon ang kaso sa leptospirosis sa maong dapit ug hapit na sila mahutdi og stocks sa doxycycline nga pang-alkontra niini. Duna say nakasinati og kalibanga ug uban pang sakit. Karong Lunes si Bacasmas gikatakdang mobiyahe ngadto sa Mindanao aron maghatud sa mga tambal.

Si Gullas nagpasalamat usab kang Chester Cokaliong sa Cokaliong Shipping Lines kinsa mopagamit sa ilang barko nga kargahan sa hinabang paingon ngadto sa Iligan City ug kang Pinky Sy sa Trans-Asia Shipping kansang barko maoy modala sa mga hinabang sa Cagayan de Oro City. (BANATNEWS)