Getaway vehicle sa tulisan nakit-an

CEBU, Philippines - Napalgan na sa kapulisan ang motorsiklo nga gidudahang maoy gisakyan sa duha ka mga tulisang mipusil patay sa usa ka kawani sa M.Lhuillier ug misakiyo sa gituohang P2.5 milyones niadtong Biyernes sa hapon diha sa barangay Poblacion sa dakbayan sa Toledo.

Usa ka Kawasaki Aura nga motorsiklo nga walay plate number kolor puwa nga gidudahang maoy gigamit nga getaway vehicle sa duha ka tulisan nakit-an nga gibiyaan sa bukirang barangay Subayon sa Toledo sa milabay’ng gabii.

Ang duha ka mga tulisan gihulagway nga dunay gitas-on nga 5”10 apan di maklaru ang mga panagway tungod kay gawas nga naka-jacket nagsul-ob sab sila og kawo ug nagtaptap pa gyud og panyo sa ilang nawong.

Gikompirmar ni SPO3 Carmelito Hornales nga ang napatay mao ang kawani nga si Domingo Del Mar kinsa napusilan sa dughan tungod sa wala paghatag dayon sa bag nga gisudlan sa gi-withdraw nilang kwarta gikan sa Metro Bank.

Samtang ang kauban niini nga nag-withdraw sa bangko mao ang branch manager nga si Nerrisa Ulgasan, ug ang teller nga si Gelie Soson. Ang tulo nanglakaw lang nianang tungora.

Gihulagway ni Hornales nga distansiya lang og gibanabanang 50 metros gikan sa police station ug usa ka gatos metros gikan sa Metrobank ug sa opisina sa M.Lhuillier Toledo Branch ang nahitaboan.

Nagtuo ang mga polis nga di taga Toledo ang mga suspek kay wala masuhito sa bukid tungod kay giingong nagpangutana pa sila kun asa molusot ang dalan nga ilang gisubay.

Hangtud karon ning pagsulat sa balita sumala pang Hornales wala gihapon mohatag ang tagdumala sa M. Lhuillier og kantidad sa nasakiyong kwarta samtang padayon ang imbestigasyon sa hitabo. (BANATNEWS)