Kita sa NEWSCOOP midako

CEBU, Philippines - Ang Cebu News Workers Multipurpose Cooperative kon “News Coop” misaka sa iyang rating gikan sa number 18 karon naa na kini sa number 13 base sa uwahing pagsusi sa National Confederation of Cooperatives (NATCCO) ug Cooperative Development Authority (CDA) sa tanang mga kooperatiba sa 1,500 ka kooperatiba sa Visayas.

Kini human mogawas nga misaka ang kita sa maong kooperatiba sa mga tigbalita gikan sa Enero hangtud Oktubre ning tuiga ngadto sa P793,000 gikan P709,000 sa susamang panahon sa nakalabay’ng tuig.

Si Elias Baquero, chairman sa board of directors sa News Coop ug presidente sa Cebu Federation of Beat Journalists (CFBJ) mibutyag nga gikatakdang mas dako-dako unya ang dibidendong bahinon sa mga miyembro niini gikan sa P437,000 (2010) sa milabay’ng tuig ngadto sa P600,000 niining tuiga. “The amount is already a net income. This means we can give more dividends to our News Coop members during the general assembly in April 2012’, ni Baquero pa.

Masaligon si Baquero nga makab-ot ang P1 milyon nga income sa kooperatiba karong tuiga pinaagi sa paggamit sa mga ‘natulog’ nga kwarta nga ibutang sa time –deposits ug product distribution.

Sa padayong pag-uswag o paglambo sa Newscoop kung dunay mamatay nga miyembro ang Newscoop mohatag kini og P17,000 isip hinabang ngadto sa pamilya sa namatay ug P10,000 ngadto sa associate member ug P3,000 sa matag miyembro nga mabiktima sa kalamidad.

Niadtong Oktubre 31, 2011 ang News Coop dunay P13.825 milyones nga total asset nga padayong nagtubo nga beripikado sa usa ka Certified Public Accountant nga si Franco Baricuatro.

Base sa record sa Cooperative Development Authority (CDA) ang News Coop mao ray media cooperative sa nasud nga malampuson ug may lig-on nga Board of Directors.

“Although seminars for members of the Board of Directors are mandatory under the Republic Act 9520, we were able to trim down expenses to maximize net income,” dugang ni Baquero.

Si Baquero nagpasalamat sa suporta sa mga miyembro sa Board ingon man uban opisyales sa kooperatiba tungod sa maong kalamposan. (BANATNEWS)