Gibuslota'g ulo diha sa hantakan

CEBU, Philippines - Nabuslot ang ulo sa usa ka 28-anyos nga lalaki human gipusil sa usa sa tulo ka wala mailhing mamumuno samtang nagsugal og hantak atubangan sa usa ka tindahan sa merkado publiko sa sitio Huyong-Huyong sa barangay Mambaling kagahapon sa alas-4 sa kaadlawon.

Si Christopher Empinado, 28, nagpuyo sa maong lugar, dead on the spot human nakaangko’g samad pinusilan sa iyang ulo.

Si PO3 Ruth Violango sa Homicide Section sa Cebu City Police Office (CCPO) nagkanayon nga wala pa silay motibong nakita sanglit wala pay saksi nga mipatim-aw tungod sa kahadlok bisan kun dunay nakakita sa maong pagpamusil.

Subay sa ilang pasiunang pakisusi nagbutyag nga naghantak ang biktima uban sa laing upat ka mga tawo atubangan sa usa ka tindahan.

Sa wala pa ang insedente, duha ka tawo nga misuhid sa palibot daw nangita kang Empinado ug sa dihang nakit-an kini sa hantakan namiya dayon ang maong mga lalaki.

Apan wala magdugay mibalik ang duha nga may kuyog nga laing usa ka lalaki nga nagsul-ob og kolor pulang jacket ug maoy miduol sa biktima dayong dul-it sa dalang armas ngadto sa ulo ug gipusil si Empinado.

Patay dihadiha ang biktima ug naglumbaanay og panagan ang mga sugarol samtang yanong mibiya sa maong dapit ang tulo ka gikatahapan.

Nakuha sa kapulisan ang upat ka basiyo sa bala sa .9mm sa crime scene, apan matud ni Violango dili pa sila makasulti kun mao ba gyud kini ang gigamit sa mamumuno sanglit ang mga tawo sa dapit nakadungog ra og usa ka lanog nga buto sa armas.

Si Violango nagkanayon nga subay sa nakuha nilang background sa biktima tigbantay lang kini sa volleyball court.

Subayon pa usab sa kapulisan kun wala bay kontra ang biktima o kaha gisamokan na nga kanunay lang maghantak ang biktima uban sa mga sugarol sa maong lugar.

Matud ni Violango ang pamilya sa biktima dunay gidudahang tawo nga mihaom sa hitsura sa mamumuno. (BANATNEWS)