Lalaki ug babaye nasikop sa buybust

CEBU, Philippines - Nasikop sa buy bust operation ang gikatahapang pusher og shabu kuyog sa usa ka babaye sa purok Grancena sa barangay Opao, dakbayan sa Mandaue sa miaging hapon.

Ang nadakpan mao si Christopher Baunsit alyas Tope, 33 ug si Adelfa Vitor, 31, nga pulos nagpuyo sa nahisgotang dapit.

Si SPO1 Rolando Planco sa Presinto 5 sa Mandaue City Police Office (MCPO) nga nagbase sa barangay Opao miingon nga gihimo nila ang pagpaniid sa mga ilegal nga kalihokan sa maong suspetsado sulod na sa pipila ka adlaw .

Dugang pa niya nga ilang nasuta nga positibo ang kalambigitan niini sa pamatigayon sa gidiling drugas maoy hinungdan nga gihimo gilayon nila ang buy bust operation nga gipangulohan ni Inspector Areston Bataluna.

Matud pa ni SPO1 Plando nga si Bataluna mipadala og police decoy sa pagpalit og shabu ug dungan sa pagtunol sa suspetsado og usa ka pakete sa shabu ngadto sa police decoy dihadiha giwitkan usab dayon nila sa posas ang kamot niini busa wala na kini makadagan.

Si Vitor misuway unta sa pagdagan apan nadakpan dayon sa kapolisan   ug   gipriso usab kini karon tungod kay nasakpang naghupot   og tinfoil nga gamiton sa paghingos og shabu.

Giandam na ang kasong isang-at batok sa duha ka dinakpan. (BANATNEWS)