Housing project ni Cortes dili na alang sa urban poor

CEBU, Philippines - Gitinguha ni Mayor Jonas Cortes ang pagpadayon sa housing project nga gisugdan sa pag-ugmad ni kanhi Mandaue City Mayor Thadeo Ouano diha sa barangay Looc sa maong dakbayan apan dili para sa mga kabus kundili alang sa mga maestra ug mga kawani sa gobiyernong walay kapuy-an.

Sa ‘Barangayan’ nga gipahigayon sa barangay Subangdaku nga giapilan sa mga department heads niadtong miaging adlaw gipahibalo ni Cortes nga tinguha niyang ipadayon ang maong proyekto.

Matud pa niya nga dili na hinuon mga urban poor sa dakbayan nga mao untay orihinal nga beneficiaries sa maong proyekto ang makabenepisyo niini tungod kay nakita man niya nga dili sila makasugakod sa matag bulan nga balayranan. Si Cortes mipasabot nga iyang nakita nga nagpadayon ang pagpahimutang sa mga kabus sa dakbayan ngadto sa mga relocation sites sa dakbayan apan nataligam-an na ang uban pang hut-ong sa katilingban sama sa mga magtutudlo ug kawani sa kagamhanan nga nagkinahanglan usab og tabang sa kagamhanan.

Gipasabot niya nga bug-at alang sa mga beneficiaries sa Paradise Island sa barangay Looc ang P5,000 nga kantidad nga ilang obligasyon sa matag bulan ngadto sa kagamhanan.

Kini ang hinungdan nga   itakli na kini ngadto sa mga magtutudlo ug mga kawani sa kagamhanan isip mga beneficiaries sa maong housing program nga gigahinan sa National Housing Authority (NHA) og salapi nga nagkantidad og P100 ka milyon.

Dugang pa ni Cortes nga ang NHA mihatag na sa ilang pagtugot sa mao niyang plano nga iyang gitinguhang sugdan sa pagpatuman alang sa hingpit nga pagtapos sa kaugmaran sa maong housing project sa barangay Looc sa maong dakbayan. Kahinumdoman nga ang maong condominium type nga housing project gisugdan sa pagtukod ni 6th District Board Member Thadeo Ouano sa iyang administrasyon isip mayor kaniadto sa dakbayan.

Naabtan sa pagkapupos sa iyang termino ang maong proyekto ug gipahunong ang kaugmaran niini sa pag-asumer ni Cortes sa katungdanan. (EIM) (BANATNEWS)