Sensilyo gidaginot sa mga tulisan

CEBU, Philippines - Duha ka mga tulisan nga mitulis sa usa ka burger outlet sa barangay Lipata sa lungsod sa Minglanilla kagahapon sa alas 2:00 sa kaadlawon apan sensilyo ray ilang nadala.

Ang nabiktima sa pagpanulis mao ang Angels Burger nga nahimutang sa maong lugar nga gibantayan sa cashier nga si Ma. Theresa Meguiso, 30, ug molupyo sa Poblacion-3 siyudad sa Carcar.

Samtang duha ka mga lalaki nga nagsakay og motorsiklo nga walay plate number ug usa niini armado og kalibre .45 ang gitumbok nga responsable sa krimen.

Matud ni PO1 Mary Christine Nacario sa Minglanilla Police dihang nahinabi sa Banat News nagpakaaron-ingnong kustomer ang angkas sa motorsiklo ug mi-order pa og buy one take one nga burger.

Mibayad pa ang tulisan og P100 apan dihang giablihan na sa biktima ang drawer aron iyaha untang suklian kalit gitionan sa tulisan og armas ang ulo sa biktima dayong deklarar nga tulis.

Gihurot og kuha sa tulisan ang sulod sa drawer, apan sa pag-imbentaryo P568 lang ang nakuha. Ang kapolisan padayon pa sa pagpangita sa mga tulisan.  - BANAT NEWS