Fratman girakrakan

CEBU, Philippines -  Pabiling anaa sa talandugong kahimtang ang 22-anyos nga sakop sa Tau Gamma Phi Fraternity nga gitabangan og pusil sa duha ka lalaking nagmotor diha sa highway sa barangay Cansaga sa lungsod sa Consolacion kagahapon sa alas 12:10 sa sayong kaadlawon.

Ang biktima nga pabiling gipaubos sa obserbasiyon sa mga doktor mao si Anthony Anfon, 22, nagpuyo sa Purok-6 barangay Nangka Consolacion.

Samtang duha ka mga batan-ong lalaki nga nag-angkasay ug sakay sa Honda XRM nga motorsiklo nga wala makuha ang plate number maoy gitumbok nga responsable sa krimen. Matud ni PO3 Allen Garciano, desk officer sa Consolacion Police dihang nahinabi sa Banat News subay sa imbestigasyon ang biktima gikan nga nag-snacks sa usa ka bakery sa maong lugar ug padulong na mouli dihang kalit kining gihunongan sa mga gikatahapan ug girakrakan.

Ang biktima gibiyaang nagbuy-od sa dalan sa mga kriminal kinsa daling mipasirit palayo. Ang biktima kasamtangang giatiman sa tambalanan sa dakbayan sa Sugbu ug pabiling way panimuot atol ning pagsulat sa balita.

Nakuha sa kapolisan diha sa crime scene ang lima ka kabhang sa bala sa 9mm nga bala ug laing tulo ka deformed slugs nga gituohang gikan sa armas nga gigamit sa mga suspek. Ang kapulisan padayun pa sa ilang imbestigasyon sa maong panghitabo. (BANAT NEWS)