Van salesman gitulis sa nagmotor sa Balamban

CEBU, Philippines - Lain na usab nga salesman ang gitulis sa tulo ka mga armadong lalaki nga sakay og motorsiklo diha sa highway sa barangay Cantuod sa lungsod sa Balamban niadtong Sabado sa alas 3:10 sa hapon ug misakiyo sa dul-an sa P50 mil nga koleksyon.

Ang biktima mao si Hayper Alcover Baritua, 27, molupyo sa Poblacion-1 siyudad sa Carcar ug salesman sa LPG Petronas Corporation.

Samtang ang gitumbok nga mga responsable tulo ka mga batan-on nga nag-angkasay sa motorsiklo nga Honda XRM nga kolor itom ug puti nga dunay plaka nga SRS-6627.

Matod ni SPO1 Julius Obanana, desk officer sa Balamban Police Station dihang nahinabi sa Banat News, sakay sa ilang sakyanan ang biktima naghatud sa ilang mga produkto sa ilang mga kustomer sa sitio Combando.

Samtang naghatud ug nangolekta sa bayad kalit kining gidumbol sa mga tulisang nagmotorsiklo ug ang duha ka angkas daling mikanaog ug mition og armas sa biktima dayong deklarar og tulis.

Wala makalihok sa kahadlok ang biktima usg gilabni sa duha ka suspek ang gisambilay nga bag niini nga gisudlan sa koleksiyon nga moabot og P36 mil.

Daling nisakay og balik sa motor ang mga suspek ug sibat pahilayo samtang ang biktima igo nalang pagdangop sa buhatan sa kapulisan.

Sayo nianang adlawa, duha usab ka lending collectors sa barangay Perrelos siyudad sa Carcar ug sa Naga ang gitulis sa mga lalaking nagmotorsiklo.  - BANAT NEWS