Homeowners Ass. sa Tabok aprobado

CEBU, Philippines - Ang mga molupyo sa sitio San Vicente , barangay Tabok dakbayan sa Mandaue kinsa nagkahugpong ubos sa ngalang San Vicente Ferrer Tabok Homeowners Association, Inc. (SVFTHAI) rehistrado na sa Housing and Land Use Regulatory Board (HULRB) isip 11793.

Matud pa ni Greg Rubio, presidente sa SVFTHAI nga dugay na silang nagpuyo sa maong lugar nga walay kapunongan.

Busa nagkasabot silang tanan nga magtukod og asosasyon   ug niadtong naghinapos ang Hulyo ning tuiga namugna ang SVFTHAI nga giila dayon sa Housing and Urban Poor Development Office (HUDO) ug nianang pagka-Septiyembre gipalista na usab nila ang maong kapunongan sa HLURB .

Si Rubio kinsa usa usab ka reporter sa The Freman nagpasalamat sa katawhan nga misalig kaniya ingon man ngadto kang barangay Kapitan Felix Suico ug kang Emanuel Arong nga maoy nangulo sa HUDO nga bisan sa mubo lamang nga panahon nahimong lehitimo   ang ilang asosasyon.

Gihimakak ni Rubio ang pasangil sa pipila nga naligsan sa ilang lakang nga ang ilang asosasyon gitukod aron mosukol sa nangangkong tag-iya sa luna nga ila karong giukopar.

Nasayran nga adunay duha ka tawo nga nangangkong tag-iya sa   sa maong yuta apan walay   gikapakitang dokumento ngadto sa mga tawo nga nag-ukopar niini.

Giklaro hinuon ni Rubio nga gihimo nila ang asosayon aron katabangan ang tinud-anay nga tag-iya sa luna nga mapasayon ang sabot-sabot tali kanila o kaha sa hingtungdang ahensiya sa gobiyerno.

“Dili man mahimo nga magtinagsa og duol sa tag-iya o sa mayor aron magpatabang maong gitukod ang legal nga asosasyon, kun si kinsa nay tinuod nga tag-iya sa maong luna makigsabotsabot mi,” sumala pa ni Rubio. (WC) (BANATNEWS)