Utlanan sa Cordova ug Lapu' gisubay

CEBU, Philippines - Gumikan sa kalibog kung hain ang utlanan sa lungsod sa Cordova ug sa dakbayan sa Lapulapu habig sa barangay Babag ug sa barangay Gabi gipasusi karon ni Lapulapu City Mayor Paz Radaza sa iyang mga engineers ang mga timailhan niini.

Human masayri ni Radaza nga mitungtong na sa yuta sa dakbayan sa Lapulapu ang mga markers sa utlanan sa lungsod sa Cordova dali kini niyang gipasusi sa Lapulapu City Engineers ang ilang municipal markers nga nag-uwang sa Cordova ug Lapulapu.

Gipasabot ni Radaza mas maayo nga madeterminar ang utlanan niini aron kung adunay mga kalamboan ug proyekto sa maong mga dapit dili maapektuhan ang yuta nga walay labot.

Hinuon mipadayag si Radaza nga dili angayan ikabalaka ang habig sa barangay Babag gumikan kay klaro kaayo ang utlanan niini nga ang dakong sapa maoy utlanan sa duha ka dapit. Kahinumduman nga buot ni Cordova Mayor Adelino "Addy" Sitoy nga masuta kung hain ang ilang utlanan sa yuta gumikan sa mga proyekto ug mga kalambuan sa umaabot sa maong lungsod.

Usa sa ilang nahuna-hunaan ang pagbutang og taytayan nga magkutay sa Cebu City ngadto sa Cordova, Cordova ngadto sa Bohol ug ang plano nga pagbutang og tugpahanan sa maong lungsod. (BANATNEWS)