Tomas mosuporta sa gibabagang flyover

CEBU, Philippines -  Gipahibalo ni Kongresista Tomas Osmeña kagahapon nga iyang suportahan si Kongresista Rachel Marguerite “Cutie” del Mar sa proyekto niini nga   flyover sa MJ Cuenco ug sa Gorordo Avenue ning dakbayan nga dumalaon sa sa Department of Public Works and Highways (DPWH). Gisaway ni Osmeña si Mayor Michael Rama kinsa supak sa maong proyekto gumikan kay matud pa makapasamot lang kini sa problema sa trapiko ug ang road widening lang mao ang solusyon niini.

Nagkanayon ang kongresista nga pareho ra nga resulta ang mahatag sa flyover og road widening busa wala siya mahimuot sa baruganan ni Rama.

Dugang pa niya nga dako kaayo og magasto ang road widening ug maabtan pa gyud pila ka tuig ang paghimo niini hinungdan nga iyang giuyonan ang flyover.

Sumala pa niya nga dili lalim ang naagian ni del Mar aron lang gyud maangkon ang maong proyekto.

Samtang una nga gipadayag ni del Mar sa miaging adlaw nga iya gyud nga ipadayon ang maong proyekto bisan pa man nga dunay mga grupo nga supak niini. (BANAT NEWS)