Lugway nga 3 ka bulan sa abang gilihok
CEBU, Philippines - Ang konseho sa dakbayan sa Talisay miawhag kang Mayor Socrates Fernandez nga lugwayan pa ang gihatag nga libreng abang sa mga stalls diha sa bag-ong merkado sa barangay Lagtang.
Sa gipahigayong special session sa konseho sa siyudad niadtong Miyerkules sa buntag giaprobahan sa konseho ang resolusyon nga gipangamahanan ni Bise Mayor Alan Bucao nga nag-awhag nga lugwayan pa ang paghatag og libreng abang sa mga stalls diha sa bag-ong merkado.
Gihangyo karon sa konseho ang mayor nga hatagan og tulo ka buwan nga libre sa abang ang mga vendors aron maka-adjust sila sa sitwasyon tungod kay hasta ang mamalitay nabag-ohan.
Si Bucao nagkanayon nga ang pagbalhin sa mga vendors gikan sa kanhi merkado publiko sa Tabunok nakompleto o nahingpit niadtong Agosto 30, 2011.
Matud ni Bucao nga angayan lang nga lugwayan pa hangtud sa buwan sa Disyembre niining tuiga ang paghatag og libreng abang sa mga stall ngadto sa mga vendor. (BANAT NEWS)
- Latest
- Trending