Duha nangihi gipamusil naangol

CEBU, Philippines - Duha ka tawo nalandig sa tambalanan human sila pamusila samtang motubag unta sa sugo sa lawas sa mga dakbayan sa Danao ug Toledo, sa miaging kaadlawon.

Ang mga biktima mao sila si Lloyd Enriquez Batucan, 28, minyo, drayber sa habal-habal, nga nagpuyo sa sitio Canlapay, barangay Cogon Cruz, dakbayan sa Danao ug ang 15 anyos nga bayong-bayong nga nailhan lang sa ngalang Markie, taga barangay Sangi, dakbayan sa Toledo.

Si SPO2 Ildefonzo Prosia sa kapolisan sa maong dakbayan mibutyag sa Banat News nga samtang gi-parking ni Batucan ang motorsiklo niini sa atbang sa usa ka bangko sa barangay Poblacion, dakbayan sa Danao kay     mangihi, miduol kaniya ang duha ka wala hiilhing lalaki ug giluthang ang biktima.

Nasabak kini sa abaga ug tuong tiil  ug dihang nahagba sa yuta misibat usab dayon ang mga kriminal.

Samtang si Markie kinsa usa ka estudyante sa high school migawas sa diskohan sa barangay Luray 2, kay mangihi   dihang gipusil ang iyang ulo sa laing bayong-bayong nga 17 anyos, sa maong barangay.

Ang mga kriminal sa duha ka krimen pulos gipangita karon sa mga kapolisan samtang ang mga biktima nahilandig sa Vicente Sotto Memorial Medical Center sa dakbayan sa Sugbo. (BANAT NEWS)