Laing planta sa kuryente tukoron sa Sugbo

CEBU, Philippines - Laing langyaw nga kompanya sa kuryente ang naglaraw na usab sa pagtukod og planta sa enerhiya dinhi sa lalawigan sa Sugbo.

Kini mao ang East West Power Plant (EWPP) nga nagbase gihapon sa nasud sa South Korea.

Ang mga opisyales sa maong kompaniya mipahibawo sa mga sakop sa media sa Sugbo atol sa ilang pagbisita sa buhatan ni Gobernador Gwendolyn Garcia sa miaging Biyernes.

Ang presidente sa EWPP nga si Arthur Su Yong Jang mitug-an nga adto nila tukora sa lungsod sa Liloan ang ilang planta.

Matud pa niya nga ang maong planta nga makabuga og 200 ka megawatt nga kuryente   dako kaayo og ikatampo sa   panginahanglan sa sugang dagitabnon sa lalawigan sa Sugbo.

Hinuon midugang siya nga panigurohon nila nga mokapin pa sa 200 ka megawatt   ang ilang ika-buga nga kuryente kun matukod na ang planta   ug agdon lamang nila ang tukmang panginahanglan sa kuryente sa mga konsumedor sa Sugbo.

Samtang sa bahin ni Gobernador Garcia kini mapasalamaton kaayo sa maong tanyag sa tagdumala sa EWPP kay nagkahulogan kini sa   kaabunda na unya sa kuryente sa Sugbo nga maoy gikinahanglan sa mga negosyante sa pagpalapad sa ilang negosyo dinhi.

Midugang ang gobernador nga labaw na kining makatubag sa panginahanglan sa mga langyaw’ng investor kinsa naglaraw nga mobubo og dagkong negosyo dinhi sa Sugbo.

Busa gipasalig sa gobernadora nga hingpit nga suportahan sa kagamhanan sa lalawigan ang maong proyekto sama sa iyang gihatag nga suporta ngadto sa Korean Electric Power Corporation. (KEPCO) sa dakbayan sa Naga.  - BANAT NEWS