P5M shabu nasakmit sa kapolisan

CEBU, Philippines — Nagtingkagol sa prisuhan ang usa ka high value individual human nadakpan sa buy-bust sa Regional Police Drug Enforcement Unit (RPDEU) sa Police Regional Office-7 sa Saint Jude Acres, Barangay Bulacao, siyudad sa Sugbo pasado alas-10 sa gabii sa adlaw'ng Domingo.

Ang suspetsado mao si Ronilito Supat alyas Ronil, 38, residente sa Sitio Riverside, Barangay Bulacao, Siyudad sa Sugbo.  Nakuhaan kini og 700 gramos sa gituohang shabu nga nagkantidad og P4.7 million.

Gikataho nga si Supat usa ka sinaligan ug nagsilbing bodegero sa illegal nga drugas sa usa ka piniriso nga naa matud pa sa prisohan nga nag-atubang sab og kasong kalapasan sa Republic Act 9165.

Human sa surveillance nga gihimo nasuta nga ang suspetsado maoy nidumala sa negosyo sa illegal nga drugas ug matod pa maka dispose kini og usa ngadto sa duha ka kilo sa illegal nga drugas kada semana.

Samtang dul-an sa milyon nga kantidad sa shabu ang nasakmit sa kapolisan sa Dakbayan sa Talisay gikan sa pito ka mga tawo nga nalambigit sa ginadiling drugas nga ilang nadakpan sa managlahing drug busts sa siyudad.

Ang operatiba nisulod sa Sitio Mananga 1 ug 2 sa Barangay Tabunok  diin pito ka tawo ang matud pa nadakpan sa grupo ni Police Lt. Col. Epream Paguyod).

Nakuha gikan kanila ang 130 gramos nga adunay gibana-bana nga balor nga P850 mil.

Ang pagpakita sa kapolisan ngadto sa katawhan pinaagi sa outreach program dako og papel sa pakigbatok sa kriminalidad.

Dugang pa unya nga operasyon pagahimuon sa mosunod nga adlaw. — Romeo D. Marantal,  Gabriel Bonjoc (BANAT NEWS)