Upat mikirig sa kuryente 2 patay

CEBU, Philippines - Duha ang namatay ug laing duha usab ang grabeng napaso human makuryentihi samtang nagtaod og bomba sa poso alas- 4 pasado ang takna sa hapon niadtong miaging adlaw sa sitio Ibabao, barangay Basak, dakbayan sa Lapulapu.

Ang duha nga namatay mao sila si Ricardo Senarlo, 35, taga lungsod sa Asturias ug Llemet Talara, 49, taga Hernandez, Bohol ug pulos temporaryong nagpuyo sa maong dapit.

Samtang ang duha nga naangol mao sila si Mark Anthony Pagador, 21, ug Eleazar Jubay, pulos gihapon nagpuyo sa maong dapit kinsa nangapaso sa ilang kalawasan.

Si PO2 Franklin Bolaquia sa Homicide Section sa kapolisan sa maong dakbayan nga nahinabi sa Banat News giingong miboluntaryo ang upat nga maoy moayo sa bomba sa poso nga gipanag-iya sa ilang silingan. Sumala pa nga dugay nang wala magamit ang maong poso ug gitaya na ang tubo niini nga buot unta nilang ibton.

Matud pa ni Bolaquia nga gidukdok og maayo sa upat ang tubo hangtud nga nangatangtang ang mga taya ug gitabangan nila kini og bunlot aron maibot.

Apan tungod sa kataas na sa ilang naibot uwahi na silang nakabantay sa kalit nga pagkabali niini ug misanday sa main line sa kuryente sa Mactan Electric Company hinungdan sa ilang pagkakuryente.

Human mangalup-og ang upat dali silang gitabang sa mga silingan ug gidala sa Lapulapu City District Hospital apan ang duha nga sila si Senarlo ug Talara gideklarar sa mga doktor nga dead on arrival.

Samtang sila si Pagador ug Jubay nga nakasinati og grabeng paso sa kalawasan gibalhin sa Vicente Sotto Memorial Medical Center. (BANATNEWS)